Dieter Hasselblatt

Dieter Hasselblatt (* 8. Januar 1926 in Revel; † 19. Februar 1997 in Neuwied) is en düütschen Schriever ween. he hett Höörspeele, Romane un annere Böker schreven. Bovenhen is he bi’n Rundfunk as Redakteur un as Speelbaas för Höörspeele togange ween. He hett ok unner dat Pseudonym „Peter Zweydorn“ schreven.

Leven

Hasselblatt is 1926 in Revel up’e Welt kamen. Mit siene Familie is he an’n 9. November 1939 toeerst na Polen un denn na Düütschland oversiedelt. Dieter Hasselblatt keem na de Hitlerjugend, hett bi de Luftmacht-Helpers mitmaakt un is denn as Bordfunker bi de Luftmacht ween. 1944 is he in Gefangenschop kamen un 1948 kehr he torüch na Düütschland. Sien Abitur hett he 1949 namaakt. He studeer denn in Marborg un Freeborg Kunstgeschicht vun dat Middeloller, Philosophie, Historie, Musikwetenschop, Germanistik un Märkenforschung. 1959 promoveer he to’n Dr. phil. Na dat Studium probeer he verschedene Beroope ut. So hett he dat as Holtarbeider, Schoolmeester in’t Internat, in de Tierpleege in’n Frankforter Zoo bi Prof. Grzimek, un ok as Höker an de Huusdören versocht. Vun 1963 af an hett he de Höörspeel-Redaktschoon vun den Düütschlandfunk in Köln overnahmen.

Wat he tostanne kregen hett

Vunwegen datt de Düütschlandfunk sülms keen Höörspeele produzeern dö, hett he toeerst mol en Archiv anleggt over all Höörspeele, de bi de ARD to kriegen weern. Up Karteikarten hett he den Termin vun de Sendung schreven, dorto ok noch Rezenschonen to de enkelten Höörspeele. Over Johrteinte is düt Archiv föhrt wurrn un is dor to en unbannigen Born för Informatschonen wurrn, wenn een mol wat rechercheren will. Hasselblatt hett sik geern mit Science-Fiction befaat un vun 1969 af an hett he de Science Fiction en gröttern Krink bekannt maakt, as he for 100 Höörspeele in düt Genre Platz bi den Düütschlandfunk maakt hett. Up de doren Höörspeele folgen denn noch Essays, Diskusschonen un Wöörd achterna.

1974 is Hasselblatt Baas vun de Höörspeel-Afdeelung vun den Bayrischen Rundfunk wurrn un hett anfungen, sülms aktiv bi de Höörspeele mit to maken as Redakteur, Speelbaas un Dramaturg. Hasselblatt hett natschonal un internatschonal veel Kontakte mit Science-Fiction-Schrievers harrt. He hett Stanislaw Lem besnackt, to’n eersten Mol sunners for dat Radio to schrieven. Hasselblatt hett ok to’n eersten Mol Orson Welles sien “War of the Worlds”-Höörspeel in Düütschland utstrahlt un hett dat, gegen all rechtlichen Wedderstriet gegenan, schafft, „Per Anhalter durch die Galaxis“ as Höörspeel na Düütschland to holen. Bi 13 Höörspeele hett he sülms den Speelbaas maakt.

Blangen sien Arbeit bi den Rundfunk weer Hasselblatt ok in allerhand annere Kuntreien unnerwegens. He schreev Essays, Vertellen, Romane un Novellen, dorto ok Märken un Kritiken to Höörspeele. He weer en vun de Grünner-Liddmaten vun de Jury „Speel vun dat Johr“ un hett veer Mol den Bamberger Pries vun de AG Speeltüüch e.V. kregen. Bovento hett Hasselblatt noch Reisberichte un Sachbücher verfaat. For Grüne Männchen vom Mars – Science Fiction für Leser und Macher, wat he 1974 schreven hett, hett he den 1. Pries vun den Science Fiction Club Düütschland kregen.

Vun 1972 af an hett Hasselblatt Lehrupdräge vun de Universitäten München un Baukem harrt for Trivialkommunikatschoon un Höörspeeldramaturgie. Nadem he 1985 en Slaganfall kregen harr, is Hasselblatt 1987 pensioneert wurrn, man dormols sünd se overeen kamen, dat Hasselblatt sik bi den Bayrischen Rundfunk um tein Höörspeel in’t Johr scheren konn. Vun 1977 af an höör he to dat P.E.N.-Zentrum Düütschland mit to. He föhl, dat weer de hööchste Utteknung in sien ganz Leven. 1986 hett he for siene Verdeenste um dat Science-Fiction-Höörspeel den Kurd-Laßwitz-Pries kregen.

An’n 19. Februar 1997 is he, 71 Johre oold, in Neuwied sturven.

Warke

Lyrik heute. Kritische Abenteuer mit Gedichten (1963), Signum Verlag Gütersloh.
Aufbruch zur letzten Aventüre, Roman (1963), Hegner Verlag Köln.
Zauber und Logik. Eine Kafka-Studie (1964), Verlag Wissenschaft und Politik, Köln (Dissertatschoonsschrift vun1959, torechtmaakt).
Grüne Männchen vom Mars. Science Fiction für Leser und Macher (1974), Droste Verlag Düsseldorf, (Nee Utgave 1982) ISBN 3-7700-0386-1
Das Experiment (1975) ISBN 3-522-12200-3 (Rutgever)
Quick-check: Menschen sind ungeeignet (1976) ISBN 3-522-12480-4 (as Peter Zweydorn)
Figurenopfer, Kriminalroman (1980), Rowohlt Verlag Reinbek ISBN 3-499-14661-4
Orwells Jahr – Ist die Zukunft von gestern die Gegenwart von heute? (1983) ISBN 3-550-07725-4
Was ich weiß macht mich heiß, Kriminalroman (1985) Wilhelm Heyne Verlag München
Ich liebe Ungeheuer, sagte Munki. (Kinderbuch, mit Irene M. Tschermak, 1987) ISBN 3-926750-01-4
Am Glint beim Anku-Dranku: Eine Kindheit in Estland, (1991) ISBN 978-3-7700-0942-8
Die Beiden, der Bunte und die steinerne Stadt: Drei Märchen. (1995) ISBN 3-930777-61-4
Zwei in der Unstadt (1995) ISBN 3-927104-75-2
Aufklärung eines Modelle-Falls oder Modelle Delphin, Hiob, Saeurebad, postum rutgeven (2004) ISBN 3-8334-1760-9

To hören

1996: Professor Tarantogas Sprechstunde. BR. Stanisław Lem. Regie: Dieter Hasselblatt. Mit Kurt Lieck, Eric P. Caspar, Willy Semmelrogge. Produktschoon vun 1976. ISBN 3-89584-172-2
1996: Die Mondnacht. BR. Originalhöörspeel: Stanisław Lem. Speelbaas, Redaktschoon: Dieter Hasselblatt. Produktschoon vun 1976. ISBN 3-89584-220-6
2004: Die lymphatersche Formel. Westdeutscher Rundfunk Köln/WDR. Stanislaw Lem. Mit Martin Held. Bearbeit’: Dieter Hasselblatt. Speelbaas: Friedhelm Ortmann. ISBN 3-89813-345-1
2005: RUR: Rossums Universal Robots, Bayerischer Rundfunk. Karel Čapek. Mit Hans Peter Hallwachs, Susanne Uhlen u.v.a. torechtschostert for’t Höörspeel: Dieter Hasselblatt. Speelbaas: Heiner Schmidt. ISBN 3-89813-385-0

Utteknungen

Kurd-Laßwitz-Pries:
- Sonderpreis 1985 Für seine Verdienste um das SF-Hörspiel
- Bestes Hörspiel 1989 für Projekt Ichthanthropos gescheitert

Literatur

Regine Ahrens: Vom Weltraumklamauk zu den Abenteuern der Seele. Kurd Laßwitz Sonderpreis 1986 für Dieter Hasselblatt. In: Wolfgang Jeschke (Rutg.): Das Science Fiction Jahr 1988, Wilhelm Heyne Verlag, München, ISBN 3-453-00983-5, S. 319–341.
Horst G. Tröster: Phantasie und Kalkül. Erinnerungen an Dieter Hasselblatt, in: Wolfgang Jeschke (Rutg.): Das Science Fiction Jahr 1998, Wilhelm Heyne Verlag, München, ISBN 3-453-13313-7, S. 457–491.