Deßel
Deßel is en Stadtdeel vun de lüttje Stadt Dringelborg in Noordhessen in dat Werserbargland. Bit 1970 weer Deßel en sülvstännig Dörp. Hüdigendags leevt dor bi 800 Lüde. Up Hoochdüütsch heet de Oort Deisel.
Laag
[ännern | Bornkood ännern]De Oort liggt bi 140 m över NN un bi 25 m över dat Daal vun de Diemel an de ehr westlich Över. Deßel liggt in den Landkreis Kassel 5 km süüdlich vun de Werser bi Herstelle. Dat is nich wiet af vun de Grenz na Noordrhien-Westfalen un na Neddersassen hen. In’n Oosten liggt de Reinhardswald, na Westen to finnt sik de Warborger Böörd. Deßel liggt dree km in'n Norden vun de egentliche Stadt Dringelborg. Korlshoawen liggt denn noch mol 6 km noordööstlich. Patterbuorn is na Noordwesten to 45 km wiet weg, Höxter bi 20 km na Noorden to, Göttingen 36 km ööstlich un Kassel 31 km süüdlich (allens in Luftlien meten).
Tallen un Teken
[ännern | Bornkood ännern]De Postleettall is 34388 un de Auto-Kennteken sünd KS, HOG un WOH.
Historie
[ännern | Bornkood ännern]In de Kuntreien vun Deßel un ümto siedeln al in vörhistoorsche Tieden Minschen. Ut düsse Tiet sünd noch de Resten vun en Wallborg to sehn. De finnt sik westlich vun den Oort up den Borgbarg, de 249 m hooch is. In en Urkunn stünn de Naam vun Deßel dat eerste Mol in dat Johr 1005/1006 to lesen.
An’n 31. Dezember 1970 hett sik Deßel, tohopen mit seß annere Gemeenden, de bit dorhen ok sülvstännig weern, un mit de lüttje Stadt Dringelborg, to de Stadt Dringelborg tohopenslaten.
Spraak
[ännern | Bornkood ännern]Deßel höört to de Gemarken in Hessen, wo an un for sik Plattdüütsch snackt wurrn is. Hüdigendags warrt tomeist Hoochdüütsch snackt.
Verkehr
[ännern | Bornkood ännern]Dör den Oort dör löppt de B 83. De föhrt vun Kassel her över Dringelborg un Deßel na Korlshoawen un vun dor af an fudder na Noorden to dör dat Werserdaal hen.
De neegsten Affohrten vun de Autobahn gifft dat bi Warborg un Brüne an de A 44 un bi Göttingen, Nörten-Hardenbarg un Noortheim an de A 7.
Regionalbahnhööv gifft dat in Geismar, Hümme un Korlshoawen. Neegste Stoppstell för IC- oder ICE- Töög gifft dat in Warborg, Kassel un Göttingen. Internatschonale Flaaghavens gifft dat in Hannober un in Patterbuorn.
Weertschop un Tourismus
[ännern | Bornkood ännern]Industrie gifft dat in Deßel nich. Bloß en Reeg vun lüttjere Handwarksbedrieven weert andrapen. Ok mit den Tourismus is in Deßel nich veel Staat to maken, anners, as in de Öörd dor ümto. De Bueree speelt jummers noch en Rull, ofschoonst se nich mehr so wichtig is, as fröher.
Weblinks
[ännern | Bornkood ännern]- Siet vun de Stadt Dringelborg (Hoochdüütsch)
- Tourismussiet vun dat Werserbargland (Hoochdüütsch)