Daniela Behrens

Daniela Behrens (borene Krause; * 12. Mai 1968 in Bremerhoben) is en düütsche Politikerin von de SPD.

Leven

Behrens is 1968 in Bremerhoben boren. Na dat Abitur an dat Weertschopsgymnasium in Bremerhoben hett se Politikwetenschop an de Universität Bremen studeert. Ehr Studium hett se 1993 mit dat Diplom afslaten. Von 1992 af an weer se as Redaktörin un Journalistin aktiv. Von 1995 bet 1998 hett se blangen ehren Beroop an de Fre’e Universität Berlin en Wiederbildungsstudium as Journalistin maakt. Von 2000 bet 2007 weer se Presssprekerin un Baas von de Staffsteed Marketing un Öffentlichkeitsarbeid an de Hoochschool Bremerhoben.

Politik

Behrens is 1996 Maat von de SPD worrn. 2007 is se för Heidrun Merk in’n Landdag von Neddersassen narückt. Bi de Landdagswahlen 2008 un 2013 is se över de Landslist von de SPD in’n Landdag intagen. In ehre Frakschoon weer se Sprekerin för Kultur- un Medienpolitik.

Nadem dat rood-gröne Kabinett Weil I in Neddersassen dat Regeer övernahmen hett, is Behrens an’n 19. Februar 2013 Staatssekretärin in dat Neddersassische Ministerium för Weertschop, Arbeid un Verkehr worrn.^[1] Dorüm is se an’n 20. Februar 2013 ut’n Landdag rut; för ehr is Axel Brammer narückt.^[2]

Behrens weer von de Johren 1990 af an Raadsfro in’n Gemeenraad von de Gemeen Bokel. Düt Amt hett se verloren, as de Gemeen Bokel 2011 oplööst un Deel von de Gemeen Beverst worrn is. Von 2001 bet 2014 weer se ok Maat von’n Kreisdag von’n Landkreis Cuxhoben. Behrens is Maat von’n Soziaalbund Düütschland, von’n Düütschen Journalisten-Verband, de Arbeiderwollfohrt un von Greenpeace.

Affäär

An’n 12. Mai 2017 is rutkamen, dat Behrens in’t Vörfeld von de Vergaav von en Opdrag verbadenerwies Informatschonen an en Bewarver geven hett. En Agentur harr en Opdrag över 180.000 Euro kregen, nadem de Firma vörher von Behrens persönlich beraden worrn is. Dat Ministerium hett dorto seggt: „Es hat Fehler im Vergabeverfahren gegeben, die Vorgespräche haben zu einer Wettbewerbsbeschränkung geführt“. De 74 annern Bewarvers harrn so gorkeen Chancen.^[3] Behrens is dorüm Huusholtsuntreue vörhollen worrn. Minister Olaf Lies hett dorüm an’n 17. Mai 2017 dorüm beden, dat Behrens ehren Posten afgeven mutt.^[4]

In’n September 2018 warrt Behrens Geschäftsföhrerin von’n Informatschoonsdeenst Wetenschop in Baukem.^[5]

Privaat

Behrens is verheiraadt mit Roger Behrens. Bet 2009 hett se noch Krause-Behrens heten, hett denn aver ehren Geboortsnaam afleggt.

Weblenken

Daniela Behrens. Mehr Biller, Videos oder Audiodateien to’t Thema gifft dat bi Wikimedia Commons.

Behrens ehr Websteed (hoochdüütsch)

Footnoten

↑ http://www.mw.niedersachsen.de/portal/live.php?navigation_id=5474&article_id=15848&_psmand=18
↑ Website Landtag Niedersachsen, afropen an’n 20. Februar 2013
↑ Auftragsvergabe abgesprochen? Wirtschaftsministerium bricht eigene Regeln, Hannoversche Allgemeine Zeitung von’n 15. Mai 2017
↑ Michael B. Berger, Heiko Randermann: Staatssekretärin Daniela Behrens zurückgetreten, Hannoversche Allgemeine Zeitung von’n 18. Mai 2017
↑ Inga Hansen: Das war’s mit der Politik, Niederelbe-Zeitung an’n 20. April 2018, Sied 13

[1] ttp://www.mw.niedersachsen.de/portal/live.php?navigation_id=5474&article_id=15848&_psmand=18

[2] Website Landtag Niedersachsen, afropen an’n 20. Februar 2013

[3] Auftragsvergabe abgesprochen? Wirtschaftsministerium bricht eigene Regeln, Hannoversche Allgemeine Zeitung von’n 15. Mai 2017

[4] Michael B. Berger, Heiko Randermann: Staatssekretärin Daniela Behrens zurückgetreten, Hannoversche Allgemeine Zeitung von’n 18. Mai 2017

[5] Inga Hansen: Das war’s mit der Politik, Niederelbe-Zeitung an’n 20. April 2018, Sied 13

[1]

[2]

[3]

[4]

[5]