Dalwhinnie (Brenneree)
| Dalwhinnie | |
|---|---|
 De Brenneree Dalwhinnie (Foto: Bill Henderson) | |
| Land | Schottland |
| Region | Highlands |
| Tyyp | Malt |
| Status | aktiv |
| Besitter | Diageo |
| Grünnt | 1897 |
| Grünner | John Grant, George Sellar un Alexander Mackenzie |
| Architekt | Charles Chree Doig |
| Waterborn | Allt an t’Sluie Burn |
| Washstill(s) | 1 x 17.000 l |
| Spiritstill(s) | 1 x 14.000 l |
| Produkschoonsvolumen | 1.300.000 l |
Dalwhinnie is en Whisky-Brenneree in Schottland. Se liggt in den Oort Dalwhinnie in’n Inverness-shire. De Hüüs vun de Brenneree sünd in de schottischen Denkmollisten in de Kategorie B inordent[1]. De Destille höört to den Kunzern Diageo un tellt to jemehr Reeg vun Classic Malts.
Historie
[ännern | Bornkood ännern]De Dalwhinnie-Brenneree is 1897 vun John Grant, George Sellar un Alexander Mackenzie ünner den Naam Strathspey grünnt worrn. De Produkschoon güng 1898 los. Man, de dree Besitters keem al en poor Maanden later in finanzielle Noot, so dat de Brenneree al in’n November 1898 vun John Sommerville & Co. un A P Blyth & Sons övernahmen worrn is. Se geven ehr den Naam Dalwhinnie un geven den Architekt Charles Chree Doig den Opdrag en poor Ännern an de Destille to maken.
1905 is de Brenneree vun Cook & Bernheimer, den dormols gröttsten amerikaanschen Brenner, in en Aukschoon köfft worrn. Dat weer dat eerste mol in de Historie, dat en schottische Brenneree in den Besitt vun en utlännsch Ünnernehmen gahn is. MacDonald Greenlees & Williams Ltd. hebbt 1919 ünner dat Regeer vun Sir James Calder de Brenneree övernahmen, de 1926 an de Distillers Company Limited (DCL) gahn is un 1930 an de Scottish Malt Distilleries (SMD) övergeven weer.
Dör en Füür ion’n Februar 1934 is de Brenneree meist vullstännig tonichten maakt worrn. Eerst veer Johren later is se wedder in Bedrief gahn. 1968 weern de huusegenen Moltboddens dicht maakt. In’t Johr 1986 is Dalwhinnie denn kumplett renoveert worrn. 1991 is en Besökerzentrum inricht worrn. In de Tiet vun 1992 bit 1995 weer de Brenneree noch mol wedder wegen Renoveren dicht wesen.
Produkschoon
[ännern | Bornkood ännern]
(Foto: Ralf Roletschek)
De Brenneree Dalwhinnie tellt to dat Whiskyrebeet Highlands un kriggt ehr Water ut den Allt an t’Sluie. Dat Molt warrt ut de United Distillers-Moltereen in Burghead un Roseisle betogen. In de Destille gifft dat en Meeschfatt ut Eddelstahl vun 6,8 Tunnen un söss Gäärfatten to 34.000 l, wovun fief ut Sibirsche Lärken un de annere ut Douglasienholt maakt is. Brennt warrt de Whisky in een Wash still vun 17.000 l un een Spirit still to 14.000 l, de vun Damp hitt maakt warrt.
Kiek ok
[ännern | Bornkood ännern]Literatur
[ännern | Bornkood ännern]- Michael Jackson: Whisky - Die Marken und Destillerien der Welt. Dorling-Kindersley, München 2005, ISBN 978-3-8310-0764-6.
- Charles MacLean (Rutgever): Whisky. World Guide, Regions, Distillers, Malts, Blends, Tasting Notes. Dorling Kindersley, London et al. 2008, ISBN 978-0-7566-3349-3.
- Walter Schobert: Das Whiskylexikon. Fischer Taschenbuch Verlag, Frankfort an’n Main, 2003, ISBN 978-3-596-15868-3.
Borns
[ännern | Bornkood ännern]Weblenken
[ännern | Bornkood ännern]
Koordinaten:56° 56′ N, 4° 14′ W