Dailuaine

Vun Wikipedia
Zur Navigation springen Zur Suche springen
Dailuaine
Dailuaine Distillery, near Aberlour - geograph.org.uk - 289839.jpg

De Brenneree Dailuaine (Foto: Christopher Gillan)

Land Schottland
Region Speyside
Tyyp Malt
Status aktiv
Besitter Diageo
Grünnt 1851
Grünner William Mackenzie
Waterborn Balliemullich un Green Burn
Washstill(s) 3 × 18.700 l
Spiritstill(s) 3 × 20.500 l
Produkschoonsvolumen 3.200.000 l

Dailuaine is en Whiskybrenneree in Charlestown of Aberlour, Speyside, Schottland.

Historie[ännern | Bornkood ännern]

De Brenneree is 1851 vun William Mackenzie grünnt worrn. He is 1865 doodbleven, un sien Weetfro hett de Destille denn an James Fleming, en Bänker ut Aberlour, verpacht. De hett tosamen mit den William Mackenzie sien Söhn de Firma Mackenzie & Company grünnt. De Brenneree is 1884 renoveert un utboet worrn. Se weer to de Tiet en vun de gröttsten Brennereen in de Highlands. Hier hett de Architekt Charles Chree Doig 1889 de eerste Pagood vun Schottland boet.

1891 is de Dailuaine-Glenlivet Distillery Ltd. grünnt worrn, de 1898 mit de Talisker Distillery Ltd. to de Dailuaine-Talisker Distilleries Ltd. tosamenföhrt worrn is. De Imperial-Destille, de en Johr dorför vun Thomas Mackenzie grünnt weer, as ok en Grain-Brenneree in Aberdeen sünd mit dorto kamen. Thomas Mackenzie is 1951 storven. Een Johr later is dat Ünnernehmen vun John Dewar & Sons, John Walker & Sons un James Buchanan & Co. verköfft worrn. Bi en Groot Füür 1917 is dat Pagodendack vullstännig tonichten maakt worrn un de Brenneree müss dicht maakt warrn. Dree Johren later weer se wedder apen maakt un 1925 vun de Distillers Company Limited (DCL) övernahmen.

Dailuaine is 1960 vullstännig överarbeit worrn. Dorbi weer ok de Tall vun de Brennblasen vun veer op söss vergrötter. En Saladin Box keem an Steed vun de Malting Floors. Siet 1983 warrt dat Molt för de Produkschoon vun frömme Brennereen köfft. In’t Johr 1987 is de Destille vun United Distillers (UD) övernahmen worrn un dormit hüüt in’n Besitt vun Diageo.

Produkschoon[ännern | Bornkood ännern]

Dailuaine tellt to dat schottische Whiskyrebeet Speyside. Se betütt ehr Water för de Produkschoon ut den Balliemullich un den Green Burn. Dat Molt warrt vun de United-Distillers-Maltings in Roseisle Muir of Ord (Glen Ord) un Burghead anköfft. In de Brenneree gifft dat een Meeschfatt (mash tun) ut Eddelstahl vun 11,5 t un acht Gäärfatten (wash backs) to 55.000 l ut Lärkenholt. Brennt warrt in dree wash stills to 18.700 l un dree spirit stills to 20.500 l, de mit Damp hitt maakt warrt.

As Single Malt warrt blots ruchweg twee Prozent vun den produzeerten Whisky in’n Hannel bröcht. De warrt blots in Sherry-Butts lagert. De Rest vun den Whisky lagert in fröhere Bourbon-Fatten un warrt för Blend-Whisky bruukt.

Kiek ok[ännern | Bornkood ännern]

Literatur[ännern | Bornkood ännern]

  • Charles MacLean (Rutgever): Whisky. World Guide, Regions, Distillers, Malts, Blends, Tasting Notes. Dorling Kindersley, London et al. 2008, ISBN 978-0-7566-3349-3.
  • Walter Schobert: Das Whiskylexikon. Fischer Taschenbuch Verlag, Frankfort an’n Main 2003, ISBN 978-3-596-15868-3.

Weblenken[ännern | Bornkood ännern]

Commons-logo.svg Dailuaine. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:57° 27′ N, 3° 16′ W