Dükeraanten

Vun Wikipedia
Dükeraanten
Waart vun de Tafelaant
Systematik
Ünnerstamm: Warveldeerten (Vertebrata)
Klass: Vagels (Aves)
Ornen: Gösevagels (Anseriformes)
Familie: Aantenvagels (Anatidae)
Ünnerfamilie: Echte Aanten (Anatinae)
Tribus: Dükeraanten
Wetenschoplich Naam
Aythyini

De Dükeraanten (Aythyini) sünd en Tribus mank de Aantenvagels. Se leevt sunnerlich in Söötwater up de Noordhalfkogel. Anners, as de Swemmaanten, de ehr Freten bi dat Grünneln finnen doot, kaamt se dor ran, wenn se na’n Grund dükern doot.

Kennteken[ännern | Bornkood ännern]

Vunwegen, datt se ehr Freten bi’t Dükern oder Swemmen unner Water finnen doot, is ehr Lief wat stebiger un de Hals wat körter, as bi de Swemmaanten. Dormit se nich so’n Last mit dat Dükern hefft, liggt se man deep in’t Water un drievt nich so na boven up. De groten Föte sett wiet achtern an’t Lief an. Mit dat Afflegen vun't Water hefft se ehre Last, vundeswegen mütt se man en oorntlichen Anloop nehmen. Liekers könnt se goot flegen.

De Waarten sünd faken bunt farvt, man nich so staatsch, as bi allerhand Swemmaanten. Ehre Feddern lücht ok nich so dull. Waart un Aante verscheelt sik düütlich, de Farven bi de Aant fallt nich wieter groot up. Bi de Dükeraanten fehlt ok de Flunkenspegel, de bi de Swemmaanten to finnen is.

Wo se leven doot[ännern | Bornkood ännern]

Dükeraanten wohnt in Gemarken, wo dat rieklich Söötwater gifft. Dat is man roor, dat se an de Küsten vun de See to finnen sünd. Vunwegen, datt se an ehr Freten rankaamt, wenn se dükert, könnt se ok up deeper Water leven, wo de Swemmaanten bi’n Grünneln nix mit an to fangen weet. Se hefft sik over all Kontinente utbreet, man bloß nich in de Antarktis. An’n meisten Aarden gifft dat up de Noordhalfkogel, sunnerlich in Noordamerika.

Wie se leven doot.[ännern | Bornkood ännern]

Se freet sunnerlich Plantendeele, man ok lüttje Deerter, as Waterinsekten, Kreefte un Sniggen. Dat gifft Aarden, de leevt man bloß vun Planten. Man dat gifft ok Aarden, as de Reegeraante un de Swattbunte Aant, de meist bloß Tiere freten doot. Ofschoonst se meist dör Dükern an ehr Freten kaamt, könnt se in flach Water ok grünneln. Deep unner Water könnt se de Ogen nich bruken, dor finnt se ehre Büte mit de Tastsinnzellen up’n Snavel. In’n Döörsnitt dükert se bi 30 Sekunnen, man se könnt ok bit to 60 Sekunnen unner Water blieven. Meist gaht se 1 bit 3 m unner Water, man bi Reegeraanten ist faststellt wurrn, dat se bit hen to 7 m deep dükert sünd.

For een Brödeltied hefft de Dükeraanten man bloß een Partner, man ehr datt de Jungen ut’n Ei krapen sünd, lööst sik de Paare wedder up.

Systematik[ännern | Bornkood ännern]

De Dükeraanten ehre Sustergrupp sünd de Swemmaanten. Dor slaht se na in allerhand Aart, wie se sik upföhren doot. De Marmelaante is en Aant, wo sik de Zoologen nich alltied eenig sünd, ob se to de Swemm- oder to de Dükeraanten torekent weern mutt. Na Kear höör düsse Aarden to de Dükeraanten to:

Literatur[ännern | Bornkood ännern]

  • Janet Kear (Rug): Ducks, Geese and Swans. Oxford University Press, Oxford 2005, ISBN 0-19-854645-9.