Claus von Klenck

Eberhard Claus von Klenck (* 1761 in Wellingsbüttel; † 22. Januar 1821 in Bremen) weer en düütschen Verwaltungsbeamten un Politiker.

Von Klenck is 1761 in Wellingsbüttel op dat Eddelgood von de Familie boren worrn. He weer von’n 27. September 1776 bet to’n 27. Februar 1779 as Akademist bi dat Michaelisklooster in Lümborg un hett von 1779 af an an de Universität Göttingen Juristeree studeert. He is 1783 denn Amtsauditer bi dat Amt Neehuus worrn. 1784 hett he ok noch en Steed as Assesser bi dat Bremen-Veernsche Hoffgericht Stood annahmen. 1787 is he Würklichen Raat bi de Justizkanzlie Stood worrn.

1791 is he Amtmann in dat Amt Mesborg worrn un 1797 denn in dat Amt Bremervöör. Dat is he bet to sien Dood 1821 bleven.

In de Franzosentied weer he ünner dat Königriek Westfalen Präsident von dat Tribunal in Bremervöör un ünner dat Kaiserriek Frankriek de eerste Tribunalrichter bi dat Tribunal in Bremerleh un later Raat bi’n Gerichtshoff in Hamborg.

Na dat Enn von de Franzosentied weer he Afornten bi de Ständeversammlung von dat Königriek Hannover.

Von Klenck hett den Guelphen-Orden kregen un na em is dat Dörp Klenkendörp nöömt, dat en Tied na sien Dood bi de Moorkolonisation in dat Amt Bremervöör grünnt worrn is.