Chilperik II.

Vun Wikipedia

Chilperik II. (* um 670; † twuschen 30. Januar un 13. Mai 721 in Noyon), weer König vun Neustrien vun 715/16 af an un eenzigen König vun dat ganze Frankenriek mit Neustrien un Austrien vun 718 bit to sien Dood. He weer de leste König ut dat Huus vun de Merowingers, de sülms noch den Staff in'e Hand harrt hett un sülms wat to Seggen harrt hett.

Leven[ännern | Bornkood ännern]

Chilperik weer en Söhn vun Childerik II. un den siene Fro Bilchilde, de König Sigibert III. siene Dochter weer. Nadem siene Öllern an'e Siet maakt wurrn weern, weer he 40 Johre lang wegspeert in en Kloster, wo he as „Broer Daniel“ leevt hett. 715 is he denn vun Karl Martell siene Fiende, Huusmeier Raganfrid un Plektrudis vun Austrien as König vun Neustrien upstellt wurrn. 716 is he denn to'n König vun Neustrien beropen wurrn un folg dor Dagobert III. mit na. De Seet vun den König weer de Palz Compiègne , man meist is he mit Raganfrid in en Ossenkarren dör dat Land fohren.

Chilperik un Raganfrid hefft en Bund slaten mit de Fresen ehren Hartog Radbod (717) un ok mit Eudo vun Aquitanien (718), ofschoonst de Karolingers dor stracks gegen weern, man dat nütz jem nix. Karl slöög de Neustriers bi Amel (frz. Amblève), Vinchy (717) un Soissons (718). As Chlothar IV. sturven weer, de vun Karl Martell stöhnt wurrn weer, dor hett Karl sik Chilperik vun Eudo vun Aquitanien utlevern laten. Man denn hett he em as König vun dat ganze Frankenriek (Neustrien un Austrien) gellen laten. Dor möss Chilperik avers Karl sien Macht in Neustrien wedder for herstellen.

Sturven is Chilperik II. 721 un begraven is he in Noyon. Karl Martell hett Theuderik IV. to sien Nafolger maakt. Chilperik hett en Söhn harrt, dat weer Chilperik III..

Literatur[ännern | Bornkood ännern]

  • Eugen Ewig: Die Merowinger und das Frankenreich. 4. Uplage, dörkeken un Kumplett maakt. Kohlhammer, Stuttgart u. a. 2001, ISBN 3-17-017044-9 (Kohlhammer-Urban-Taschenbücher 392).
  • Pierre Riché: Die Karolinger. Eine Familie formt Europa. Albatros, Düsseldorp 2003, ISBN 3-491-96096-7.
  • Rudolf Schieffer: Die Karolinger. Verlag W. Kohlhammer, Stuttgart u. a. 1992, ISBN 3-17-010759-3 (Kohlhammer-Urban-Taschenbücher 441).
  • Reinhard Schneider: Königswahl und Königserhebung im Frühmittelalter. Untersuchungen zur Herrschaftsnachfolge bei den Langobarden und Merowingern. Anton Hirsemann, Stuttgart 1972, ISBN 3-7772-7203-5 (Monographien zur Geschichte des Mittelalters 3), (Togliek: Berlin, Freie Univ., Habil.-Schr., 1970/71).