Charles Anthony Werner

Charles Anthony Werner (* 28. März 1838 in New Orleans; † 18. Oktober 1891 in Hamborg) weer en düütschen Jurist.

Werner is 1838 in New Orleans boren. He keem as Kind na Hamborg un weer dor op de Gelehrtenschool. Na de School hett he an de Universität Heidelberg Juristeree studeert un sien Dr. jur. maakt. Na dat Studium keem he na Hamborg trügg un weer Avkaat. Von 1864 af an weer he Amts- un Gerichtsaktuar in Bardörp. Werner is denn na’n Dood von sien Vörgänger Samuel Samuelson an’n 19. Februar 1868 as Amtsverwalter von dat Amt Ritzbüttel wählt worrn un hett dat Amt an’n 18. März antreden. In siene Amtstied hett he ünner annern den Wernerwald twüschen Sahlenborg un Berensch anleggen laten. Dat Ritzbüttel un Cuxhoben sik 1872 to een Gemeen tohoopslaten hebbt, is ok in siene Tied passeert. Werner is bet to sien Dood dör Kreeft 1891 Amtsverwalter bleven. He liggt begraven op’n Karkhoff Ritzbüttel.

Werner hett Erminia Antonia Arnold († 1893) freet. De beiden harrn twee Kinner, Alfred (* 1869) un Elsa (* 1874).

Op’n Karkhoff Ritzbüttel steiht vondaag en Obelisk, de an Werner erinnern schall. De Wernerwald hett jüstso na em sien Naam kregen as an’n 13. Juli 1904 de Wernerstraat in Cuxhoben.