Cayos Cochinos

Vun Wikipedia
Zur Navigation springen Zur Suche springen
Cayos Cochinos in dat Municipio Roatán
Koort von de Grupp
Cochino Menor
Lütt Cay
Garifuna op Cayo Chachahuate

De Cayos Cochinos (op engelsch ok Hog Islands) sünd en Grupp Eilannen in de Karibische See, de to dat Municipio Roatán, Departamento Islas de la Bahía, Honduras, tohöört. Binnen dat Municipio warrt de Cayos Cochinos as Aldea ankeken. De Grupp besteiht ut twee gröttere Eilannen (Cochino Pequeño oder Cochino Menor un Cochino Grande oder Cochino Mayor) un 14 lüttjere Cays, de sik blots licht ut de See rutheevt. All tohoop sünd se nich grötter as 2 bet 3 km².

De Inwahnertall weer bi’n Zensus 2013 303.[1]

Siet 1993 sünd de Eilannen Naturschuulrebeed un siet 2003 tosätzlich Deel von en 460 km² groot Seeschuulrebeed (Monumento Natural Marino).

Geografie[ännern | Bornkood ännern]

De Grupp liggt twölv Kilometer af von’n fasten Wall von Honduras, hängt aver von wegen de Historie un de Kultur eng mit de Islas de la Bahía (35 km in’n Noorden) tohoop un höört dorüm ok to dat Departamento Islas de la Bahía.

De Krallenriffs rund üm de Cayos Cochinos warrt mit to dat Maya-Riff rekent.

Eilannen[ännern | Bornkood ännern]

An’n höögsten Punkt von Cochino Mayor liggt en Füürtoorn. Op de Oostsied von Cochino Mayor liggt dat Garifuna-Fischerdörp East End.

Op Cochino Menor gifft dat en Forschungsstatschoon, de de Krallenriffs un de Deer- un Plantenwelt dor ünnersöcht.

Op Cayo Chachahuate (oder Cayo Chachaguate) liggt en Fischerdörp von de Garifuna, dat meist dat kumplette Cay innimmt. As Cayo Chachahuate warrt ok dat lüttje Navereiland betekent, dat in Privaatbesitt is (tohoop warrt de beiden Cays Cayos Chachahuates nöömt).

De lüttjeren Cays sünd deelwies unbewahnt un/oder in Privaatbesitt. Ünner annern op Round Cay, Lamb Cay, Lower Long Cay, Upper Long Cay, Cayo Culebra un Cayo Bolaños gifft dat enkelte Hütten oder Hüüs.

Weertschop un Infrastruktur[ännern | Bornkood ännern]

Blangen de traditschonelle Fischeree speelt vondaag vör allen de Tourismus en grote Rull för de Weertschop op de Eilannen.

Verkehr[ännern | Bornkood ännern]

De kumplette Verkehr löppt per Boot. Dat gifft keen Straten oder annere Weeg.

Footnoten[ännern | Bornkood ännern]

  1. Zensusdaten 2013

Weblenken[ännern | Bornkood ännern]

Commons-logo.svg Cayos Cochinos. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:15° 58′ N, 86° 30′ W