Caspar Ludwig Schulte

Vun Wikipedia

Caspar Ludwig Schulte (* 30. März 1733 in Zittens; † 23. März 1806 in Plöön) weer en düütschen Aadligen.

Schulte is 1733 as Söhn von Sophie Charlotte, borene Schulte (24. März 1709-28. Dezember 1785), un Caspar Ludwig Schulte (25. Oktober 1682-15. Dezember 1732) in Zittens boren. In’t Öller von 7 bet 12 weer Meinhard Johann Hollander sien Huuslehrer. He weer von 1745 bet 1747 op de Doomschool Veern un denn von’n 14. April 1747 bet 15. Juni 1749 op de Ridderakademie Lümborg. Von 1749 bet 1754 weer he bi dat Militär un harr toletzt den Rang von en Hauptmann.

1754 hett he denn de Verwaltung över sien Göder övernahmen. Schulte weer Arvherr to Kohmöhlen, Borgmann to Hornborg un Kloosterdirekter an dat Klooster Niewohl.

An’n 3. November 1754 is he Landraad in dat Hertogdom Bremen worrn.

He weer von’n 23. Juni 1767 bet 1803 Präsident von de Ridderschop von dat Hertogdom Bremen.

Schulte hett an’n 17. August 1754 Margaretha Elisabeth Emerentia borene von Düring († 2. Mai 1758) freet. De beiden harrn twee Söhns, de aver all beid fröh doodbleven sünd. An’n 15. Oktober 1765 hett he denn in twete Eh Friederike Louise von Berlepsch (1748-22. Dezember 1793; Dochter von Johann Wilhelm Ludwig von Berlepsch) freet. De beiden harrn de Döchter Amalia Charlotta Friederica Wilhelmina (17. Juli 1766-16. März 1799) un Wilhelmina Friederica Melusina (* 30. Januar 1768). Nadem Schulte doodbleven is un keen Söhn as Arv harr, sünd siene Göder an Caspar Detlev Schulte gahn.