Caserío
Caserío (katalaansch caseriu) is de spaansche Begreep för en lüttjeren Oort. In welk Länner is de Begreep nich exakt defineert un bedüüdt meist datsülve as aldea. In annere Länner gifft dat en offizielle Definitschoon. Caserío un aldea sünd op jeden Fall lüttjer as en pueblo („Dörp“). Wielt en pueblo stärker soziaal organiseert is, is dat bi en caserío normalerwies nich so. Dat is blots en Handvull Hüüs an de sülve Steed.
Etymologie
[ännern | Bornkood ännern]Dat Woord sett sik tohoop ut casa („Huus“) un -erío, wat von latiensch -erium kummt un en Abstraktum betekent, dat sik in düssen Fall mit „Platz von, Oort von“ weddergeven lett. Wenn een dat mööglichst eng op Plattdüütsch översetten will, denn bedüüdt dat also soveel as „Hüseree“. Richtig översetten lett sik dat Woord nich op Plattdüütsch. Dat Hoochdüütsche hett dor dat Woord Weiler för un dat Engelsche hamlet.
Definitschoon
[ännern | Bornkood ännern]In Chile betekent dat Woord en Oort mit egen Naam un mehr as dree Hüüs aver minner as 301 Inwahners, de nich Deel von en anneren Oort is.
In El Salvador is dat en Ünnereenheit von en Kanton, wat sülvs en Ünnereenheit von en Municipio (Gemeen) is.
In Honduras is dat en Ünnereenheit von en Aldea, wat sülvs en Ünnereenheit von en Municipio (Gemeen) is.
In Peru betekent dat en Oort, de twüschen 151 un 1000 Inwahners hett.