Caracalla

Vun Wikipedia
Caracalla, Puschkin-Museum

Marcus Aurelius Antoninus (* 4. April 188 in Lugdunum; † 8. April 217 in Mesopotamien), beter bekannt unner den Naam Naam Caracalla, weer röömschen Kunsel un Kaiser vun dat Röömsche Riek vun 198 bit 217. He weer de Söhn vun Kaiser Septimus Severus un is hüdigendags meist bekannt as Bomeester vun Caracalla siene Thermen, man ok as en verruckten Malljann, de sien Broer Geta an’e Siet maakt hett un de sülms amenne dör de Praetorianers an’e Siet maakt wurr.

Kinnertied un Jöögd[ännern | Bornkood ännern]

An un for sik heete he Lucius Septimius Bassianus (ok as "Bessaianus" schreven), un is boren wurrn in Lugdunum, dat hüdige Lyon. Sien Vadder Septimus Severus weer boren in Leptis Magna, siene Mudder stamm ut Syrien. He is upwussen as en sachtsinnigen jungen Mann. He schall sogor bi Gladiatorenspeele den Kopp wegdreiht hebben, wenn em dat to blödig wurrn is. In dat Johr 195 hett sien Vadder bekannt geven, datt he nu in Marcus Aurelius siene Familie to’n Söhn annahmen wurrn weer un hett em umdöfft up den Naam Marcus Aurelius Antoninus, wat vun dor af an sien offiziellen Naam ween is.

Vun’n Konsul to’n Kaiser[ännern | Bornkood ännern]

202 is Antonius Konsul wurrn, tohopen mit sien Vadder. In datsülvige Johr hett he Plautilla freet, de Dochter vun Plautianus, wat de mächtige Präfekt vun de Praetorianers weer. Dat duer keene dree Johre, denn hett he ehr ut’n Weg rüümt. 205 is he to’n tweeten Mol Konsul wurrn, dütmol tohopen mit sien Broer Geta. Antonius un Geta hefft bi ehren Vadder sien Feldtog in Britannia mitmaakt, un as Severus dor 211 sturven is, bestegen de beiden tosamen den Throon as jedeen den annern sien Mitkaiser.

Antonius lett sien Broer an’e Siet maken[ännern | Bornkood ännern]

Ofschoonst ehr Vadder jem en paar Mol, un noch up’n Dodenbedde, an’t Hart leggt harr, bloß keen Striet to maken un dat Riek tohopen to regeern, is de Kloov twuschen de beiden na den Vadder sien Dood ganz vun alleen jummers grötter wurrn. As se na Rom torüchkehrt weern, möss ehre Mudder Julia Domna twuschen beide kamen, datt de beiden dat Riek nich unner’nanner updelen döen. An’n 26. Dezember 212 hett Antonius siene Mudder un sien Broder to sik kamen laten un woll, so harr he seggt, den Striet begraven. Dat duer nich lang, nadem sien Broer ankamen weer, dor störm Antonius mit en Grupp Suldaten binnen un bröch sien Broer um. Denn harr he dat drock, na dat Praetorianerlager hen to kamen. Dor köff he de Stöhn vun de Garde dör sunnerliche donativa un lä slank wat an Lohn bovenup, vunwegen, so sä he, datt he „vun Geta sien Komplott“ bitieds wat mitkregen harr. Achterna sünd all Frünnen un Anhängers vun Geta an’e Siet maakt wurrn.

Kriegstöge un Mallicheit[ännern | Bornkood ännern]

In dat Johr 213 güng dat los mit en Reeg vun Feldtöge na Germanien. He hett dor gegen de Alemannen de Böverhand kregen. In de Tied vun düsse Kriege bruukte de Kaiser faken en keltischen Suldaten-Hoiken, de caracallus nömmt wurr. Dor hett de Kaiser denn sien Binaam 'Caracalla' vun weg. 214 is he in den ööstlichen Deel vun dat Riek hentagen. Dor is jummers düütlicher bi wurrn, datt he en overspönigen Mallfent weer. So hett he meent, he sülms weer Alexander de Grote. Vundeswegen hett he en Armee upstellt mit 16.000 Mann, de mössen rümlopen as Suldaten vun 500 Johre vördem. He hett ok Suldaten ut Sparta kamen laten un hett Elefanten to düt grote Theaterspeel toföögt. Achterna hett he de Kriege vun Troja naspelen laten. He sülms speel den Achill un een vun siene besten Frünnen weer Festus. Denn sien Dood harr he mit de akraate Dosis Gift just so henkregen, datt sien Gräffnis en groot Spektakel för Festus weern konn, de in’n Krieg fullen weer. In dat neegste Johr besöch he Alexandria in Ägypten un hett unbannig veel Inwahners ümbringen laten. Dat güng över allerhand Dage hen un Teindusende vun Inwahners ohne Wapen sünd dor bi dootneiht wurrn. As Grund hett he kunnig maken laten, en paar Lüde schollen sik lustig maakt hebben över em. In datsülvige Johr sünd de famosen Thermen vun Caracalla feerdig stellt wurrn, datt gröttste Boprojekt unner siene Regeerung.

Dood[ännern | Bornkood ännern]

Um 216 rüm sünd de Kriege in Osten wat duller wurrn. Unner annern is Armenien erovert wurrn un dat röömsche Heer is ohn veel Wedderstand över den Tigris gahn. Man in de Tied vun düsse Kriege weer de Verdrutt över den wahnsinnigen Kaiser so hooch uplopen, datt he an’n 8. April 217 bi Carrhae dör en Komplott vun Macrinus, den Praefekten vun de Praetorianers, an’e Siet bröcht wurrn is.

Weblenken[ännern | Bornkood ännern]