Buxthu-Museum för Regionalgeschicht un Kunst

Fassaad von dat Heimatmuseum

Dat Buxthu·Museum för Regionalgeschicht un Kunst is dat Museum von de Stadt Buxthu.

Historie

Dat Museum is 1911 för de Sammlungen von’n Museumsvereen (1880 grünnt) von’n Sepenfabrikant Julius Cäsar Kähler boot worrn un hett an’n 9. Februar 1913 as Heimatmuseum apenmaakt. 1992 hett dat Museum tosätzlich en Neebo kregen, in den nu ok de Hauptingang liggt. Dormit is dat Museum düüdlich grötter worrn un se hebbt ok dat Kunzept modeerner maakt.

Siet 1. Juli 2015 is dat Museum deelwies slaten, üm dat önnig to saneren. Dat schull bet Harvst 2016 trech ween. Dat hett aver en Bostopp geven, nadem de Stadt Buxthu de Bäckeree Samel blangenan köfft hett. De fröhere Bäckeree schall in dat Museum integreert warrn. De Stadt will dor allens tohoop 2,8 Milljonen Euro för utgeven. De Hauptingang schall in Tokumst an’n Petri-Platz liggen. Wohrschienlich schall dat Museum an’t Enn von dat Johr 2017 denn wedder kumplett apenmaken.

Sammlung

Dat Museum vereent Regionalgeschicht un Kunst: In dat Heimatmuseum mit siene Fackwarkfassaad warrt Infos to dat Märken von’n Weddloop von Haas un Swienegel, to de Wahnkultur un ole Handwarkskunst wiest. In’n Neebo warrt de histoorsche Entwicklung von de Stadt un „Buxtehude in der Moderne“ vörstellt. To de Utstellung kaamt en Reeg aktuelle künstlerische Arbeiden to, de sik mit de Sammlung utenannersett. In’n „Sakraltoorn“ warrt christliche Kunstwarken un jemehr Restaurerung in’n Tosamenhang mit modeerne Kunzeptkunst wiest. De brietsche Künstler Michael Craig-Martin hett de Rüüm 1997 in en begahbor Gemälde verwannelt.

Stücken

In dat Museum is ünner annern de Passionsaltor von de St.-Petri-Kark ut dat Middelöller to sehn, en Triumphkrüüzgrupp un annere sakrale Kunstwarken. Dat Museum wiest jümmer wedder Sünnerutstellungen to Kunst un Themen von de Regionalgeschicht. Dat Museum is ok Rutgever von de Buxtehuder Museumshefte, de siet 1992 rutkaamt.

Weblenken

• Websteed von dat Museum (hoochdüütsch)