Buscherump

Vun Wikipedia
Mann met Buscherump um 1908 (Fotografie: Rudolf Dührkoop)

De Buscherump oder Buscheruntje is en Arbeitshemd vun de Fischer- un Fohrenslüüd. He warrt vun Linnen oder Kattun maakt un hett blaue un witte Striepen.

Etymologie[ännern | Bornkood ännern]

De Naam Buscherump is en beten Volksetymologie vun de plattdüütschen Lüüd. Dat dee toeerst Nedderlandsch boezeroentje heten (oe warrt bi de Nedderlänners as u utspraken), wat in welk Mundoorden vun dat Plattdüütsche swoor uttospreken weer. Dor hebbt se’t en beten ümmodelt, dat’n dat beter utspreken kunn (un beter marken kunn). Warrt ja man över’n Rump dragen, dorvun dat -rump. Annerwegens deen se’t ok as Bunjerundje, Buntjeruntje (Elvinseln), Bunscherunscher (Veerlannen), Butscherutscher (Allermöh), de oder dat Busch(e)runtje(e) (Blanknees, Finkwarder) kennen. Annere Mundoorden hebbt dat Woort meist unverännert ut dat Nedderlandsche övernahmen. Opmehrst bruukt warrt aver Buscherump. Boezeroentje is de Diminutiv vun boezeroen, wat eenfach en Hemd is. De Naam boezeroen schall nu vun’t Pikardsche kamen: bougeron = Hemd oder vun’t Fransche bourgeron, afleidt vun Ooltfransch bourge = ruug Stoff.