Bundsstraat 212

Vun Wikipedia
Zur Navigation springen Zur Suche springen
Bundesstraße 212
Basisdaten
Längd alltohoop: 68 km
Bundslänner: Neddersassen
Bremen
Grundricht: West-Oost
Koort
Verloop von de Bundsstraat 212
Verloop von de Bundsstraat 212
Bundsstraat in’n Westen von Braak
Brügg över de Hunte bi Elsfleth

De Bundsstraat 212 is en Bundsstraat in Düütschland, de von de Autobahn 27 in Bremerhoben bet na de Autobahn 28 bi Gannerseer geiht un 68 Kilometer lang is.

Verloop[ännern | Bornkood ännern]

De Bundsstraat 212 ennt in’n Noorden an de Grenz von de Bremerhobener Stadtdelen Börgerpark un Schippdörperdamm. De Straat münnt dor mit de Opfohrt 7 Bremerhoben-Midd in de Autobahn 27. De Verloop geiht von dor na Westen över de Geest röver na dat Zentrum von Bremerhoben bet dicht an dat Över von de Werser (Grimsbystraat un Lloydstraat). Dor knickt de Bundsstraat af na Süüdoosten op de Columbusstraat. Nadem de Straat denn wedder över de Geest röver geiht, geiht de Verloop von de B 212 över Borriesstraat, Berliner Platz, Bülowstraat un An de Geest na de Fährsteed von de Fähr Bremerhoben-Nordenham.

Op dat annere Över von de Werser in Blexen geiht de Bundsstraat denn wieder. Se löppt dor na Noordwesten un denn na Süüdwesten in en Bagen üm Nordenham rüm. Von Abbusen un Ellwörden af an is de Verloop denn na Süden. De Straat geiht an Hoff un Esenshamm langs. Bi Havendörp kummt von dat rechte Över von de Werser dör den Wersertunnel de Bundsstraat 437 ran un de beiden Straten loopt tohoop. För de nächsten dree Kilometer bet Roonkarken deelt sik B 212 un B 437 den Verloop. De Straat billt op dissen Afsnidd en Kraftfohrstraat. Nadem de B 437 bi Roonkarken na Westen afböögt, löppt de B 212 noch dree Kilometer wieder as Kraftfohrstraat. Bi Smalenfletherwurp warrt dat denn wedder en normale Straat. De B 212 löppt an Golzwarden langs un an Braak vörbi. Dor münnt de B 211 in de B 212. Denn geiht dat an Karkhammelwarden un Överhammelwarden langs na Elsfleth. In Huntebrügge geiht de Bundsstraat denn över de Hunte weg un ännert ehren Verloop na Süüdoosten. De Straat löppt na Berne, nimmt dor de B 74 op, un denn dör Hiddigwarden na Harmenhusen un böögt denn na Süden af. De Straat kummt nu ut de Masch na de Geest hoog dör den Oort Bookholzbarg. Kort na Grüppenbühren drippt de Bundsstraat mit de Opfohrt 19 Gannerseer-West op de Autobahn 28, geiht in de Landsstraat 887 över un is dormit toenn.

Historie[ännern | Bornkood ännern]

Dat Groothertogdom Ollnborg hett twüschen 1856 un 1869 en Reeg von de Öörd in de Wersermasch dör Straten verbunnen, de mehrstendeels ut inheemsche Klinkers boot worrn sünd. De Landstraat von Braak över Roonkarken un Esenshamm bet Ellwörden is 1857 trech worrn un hett de Schossee von Ollnborg na Braak (vondaag de B 211) na Noorden verlängert, de 1852 trech weer. Düsse Straat is 1858 wedder över Abbusen bet Stollhamm verlängert worrn un keem 1861 in Burhave an.

En dörgängig Straat von Bremen bet Nordenham geev dat nich. Dat geev blots en Deelstreck in’n Noorden twüschen Braak un Nordenham un een in’n Süden twüschen Elsfleth un Demost.

Ofschoonst se in slechten Utbotostand weer, is de Landstraat twüschen Bookholzbarg un Nordenham üm 1937 rüm to en Rieksstraat worrn. In’n Tweten Weltkrieg sünd de Klinkerstraten (77 % von de Rieksstraten in de Wersermasch weren Klinkerstraten) nich utbetert worrn, so dat en Deel von de Klinkers in’n weken Moorbodden versackt sünd. De Boddenwellen, de sik billt hebbt, hebbt dor för sorgt, dat dat maximal verlöövte Tempo deelwies 20 km/h weer.

In’n Dezember 1950 is de ne’e Bundsstraat von Elsfleth na Braak-Karkhammelwarden trech worrn, de as eerste Straat in de Wersermasch en lieken Verloop harr, de sik nich na de Lien von Dieken un Waterlööp richten dee. In de Midd von de Johren 1950 is düsse ne’e Bundsstraat bet na de Krüzung mit de B 211 (in’n Westen von Braak) verlängert worrn, so dat de B 212 nich mehr merrn dör de Stadt Braak lopen dee. In de Johren 1960 is de B 212 von Nordenham bet Bremerhoben verlängert worrn. De Ümgehungsstraat üm de Öörd Atens un Blexen is in Etappen twüschen 1965 un 1968 boot worrn un hett an’n 1. Januar 1968 apenmaakt.

In’n März 2002 is ok de Ümgehungsstraat üm den Oort Roonkarken trech worrn.

In Tokumst[ännern | Bornkood ännern]

Opstunns is en Oortsümgehung för Berne in Bo. De B 212 kriggt von Huntebrügge af an en ne’en Verloop, de in’n Noorden üm Berne, Hiddigwarden un Harmenhusen rüm löppt un denn op de Landsstraat 875 drippt. Disse Ümgehung schall 2018 trech ween.

För de wiedere Tokumst is dat plaant, dat de B 212 nich mehr in de Autobahn 28 münnen schall. De Bundsstraat schall in Tokumst von Harmenhusen ut wieder na Süüdoosten lopen un geiht denn bi Lemwerder, Olenesch un Diekhusen langs na Seehusen un schall dor denn an de Autobahn 281 ansluten. De B 212 löppt denn in de Bremer Merkurstraat ut.

Weblenken[ännern | Bornkood ännern]

Commons-logo.svg Bundsstraat 212. Mehr Biller, Videos oder Audiodateien to’t Thema gifft dat bi Wikimedia Commons.