Brigitte Somfleth

Vun Wikipedia
Zur Navigation springen Zur Suche springen
Brigitte Somfleth in’n November 2009

Brigitte Somfleth (* 22. März 1953 in Hitzacker) is en düütsche Politikerin von de SPD.

Somfleth is 1953 in Hitzacker boren. Se is verheiraadt un hett twee Kinner. Ehr Broder, Günter Schwarz, weer later Börgermeester von de Gemeen Seevdaal. Na dat Abitur hett Somfleth in Hamborg op Lehramt an Volks- un Realscholen studeert. 1978/1979 hett se as Stewardess op Hannelsscheep in de Grote Fohrt arbeidt. Na disse Tied weer se bet 1980 Schoolmeester an en Hambörger Grundschool. 1990 is se denn Mitarbeiderin in’t Wahlkreisbüro von’n Bundsdagsafornten Ingomar Hauchler worrn.

1985 is Somfleth in de SPD rin. Se is in’n Vörstand von’n Bezirk Hannover. 1986 is se Maat von’n Oortsraad un Viez-Börgermeesterin von Mäkelfeld/Lütt Moor worrn un 2005 hebbt se ehr as Oortsbörgermeesterin wählt. Von 1987 bet 1991 un wedder siet 2001 is se Raadsfro in de Gemeen Seevdaal. Von 1991 bet 2000 weer se ok Afornte in’n Kreisdag von’n Landkreis Horborg. Von 1994 bet 2013 (13. bet 16. Wahlperiood) weer Somfleth Maat von’n Landdag von Neddersassen. In de 13. un 14. Wahlperiood för den Wahlkreis Seevdaal un in de 15. un 16. Wahlperiood över de Landslist. 2003 is se in’n Landdag Schriftföhrerin worrn. Se is ok Liddmaat von de Gewerkschaft Erziehung un Wetenschop, de Arbeiderwollfohrt un von de Naturfrünn.

Weblenken[ännern | Bornkood ännern]

Commons-logo.svg Brigitte Somfleth. Mehr Biller, Videos oder Audiodateien to’t Thema gifft dat bi Wikimedia Commons.