Birkel-Wark Buxthu
Dat Birkel-Wark Buxthu weer en Ünnernehmensstandoort von de Birkel Teigwaren GmbH an de Stoder Straat in de Stadt Buxthu.
Historie von dat Fabrikgelänn
[ännern | Bornkood ännern]In de fröhe Neetied weer dat Gelänn, op dat later de Fabrik stünn, de Gerichtssteed von Buxthu.[1] Von de Hexenprozesse her harr de Steed dorüm ok den Naam Hexenwisch.[1]
Nadem 1881 mit de Nedderelvbahn de Iesenbahn na Buxthu keem, hett de Koopmann Carl-Hermann Richter junior 1890 direkt bi’n Bahnhoff Buxthu en Broeree opmaakt, de Unterelbe’sche Bierbrauerei Actien Gesellschaft.[1] De Broeree is al 1895 pankrott un in Dwangsaukschoon gahn.[1] Dor hett de Broer Albert Bostelmann ut Töst de Broeree köfft.[1] 1918 is dat Ünnernehmen an’n Möhlenbesitter Friedrich Hastedt verköfft worrn.[1] Nadem dat 1921 en Füür in de Möhl an’t Fleth geven hett, is de Broeree in en Nudelfabrik ümwannelt worrn. Düsse Deegworenfabrik hett 1936 dat Ünnernehmen Birkel ünner Karl Christian Birkel opköfft.[1]
Na’n Flüssigei-Skandal, de 1985 loosgüng, is de Ümsatz von Birkel dalgahn, wat dorto föhrt hett, dat dat Wark in Buxthu an’n 30. September 1988 dichtmaakt worrn is.[1] De Fabrik hebbt se 1996 afreten.[1] Nadem de Fabrik weg weer, hett dat von wegen de zentrale Laag Plaans geven, op dat Grundstück en Verwaltungsgebüüd von de Stadt oder en groten Verbrukermarkt to boon.[1] Ünner annern dör en Börgerentscheid 1998 is ut all de Plaans lange Tied nix worrn.[1] Eerst 2007/2008 is op dat Stück denn würklich wat boot worrn.[1][2] In de Etaaschen baven en Olen- un Pleegheim mit 156 Plätz un in de ünnerste Etaasch Ladens un Restaurants.[1] Intagen sünd dor ünner annern Filialen von Takko un von K+K Schuhcenter.[2] Tosätzlich gifft dat op dat ole Birkel-Gelänn Filialen von Budnikowsky, von Aldi Nord un von dat Futterhaus.[2] Allens tohoop hebbt düsse Gebüüd 14.000 Quadratmeter.[2] Boherr weer de Investor Hans-Hinrich Schulz ut Bliersdörp, de 19,8 Milljonen Euro investeert hett.[1] 2014 hett de K-&-S-Ünnernehmensgrupp ut Söttmer de Gebüüd övernahmen.[1]
Footnoten
[ännern | Bornkood ännern]- ↑ a b c d e f g h i j k l m n o Als der Buxtehuder Bahnhof noch Schranken hatte, Stader Tageblatt an’n 11. Februar 2018
- ↑ a b c d Thomas Sulzyc: Baustart am Birkel-Gelände, Hamburger Abendblatt an’n 9. März 2007
Koordinaten:53° 28′ N, 9° 41′ O