Baasdörper Krönk

Vun Wikipedia

Baasdörper Krönk is en plattdüütschen Roman vun Friedrich Ernst Peters.

Wie dat Book tostanne kamen is[ännern | Bornkood ännern]

Peters is 1962 storven. To Leevtiet hett he düssen Roman nich rutgahn laten. Dat Manuskript hett bi en Arvin överduert. Dat is woll versöcht wurrn, dat Wark to drucken, man keen Rutgever woll dat wagen, en plattdüütschen Roman rut to bringen un so is dor eerst mol nix vun wurrn. Man 1974 hett Ivo Braak dor in’n Noorddüütschen Rundfunk, in’t Funkhuus Kiel ut vörleest. Dat weer en Akschoon in den Rahmen vun de Kieler Week. Sendt wurrn is dat denn an’n 29. Januar 1976. Dor hefft Wolfgang Lindow un Paulk Selk sik denn tohopendaan un dat denn ut de Nalatenschup rutgahn laten. Schreven hett Peters dat al in de 1930er Johren. Achter dat veerte Kapitel steiht in sien Manuskript: 2.3.32 un achter dat leste Kapitel steiht 22. Oktober 1932. He hett denn woll bi een Johr bruukt för den ganzen Roman. 1975 is dat Wark denn in Husum druckt wurrn un hett woll bloß een Uplaag sehn.

Wo dat dor üm geiht[ännern | Bornkood ännern]

De Baasdörper Krönk hannelt woll vun en ganz bestimmt Dörp in ene ganz bestimmte Tiet (1900-1920). Man dat is nu doch keen Heimatgeschicht. De Dichter befaat sik dor mit dat Upkamen vun en nee Tiet un dat Anlangen vun de Industrie in en Sellschop, de sik noch tomeist mit Bueree befaten deit. De Naam vun dat Dörp ut den Titel vun sien Roman kann een up de Landkaart vun Sleswig-Holsteen nich finnen. Peters hett sik den Naam utdacht. He woll ja wiesen, wat allerwegens up de Welt los is, wenn so wat passeert. De Schriever meent in Grunne, jede Tiet leevt ehr egen Leven un de Lüde in jede Tiet mütt sik mit dat Nee, wat sik dor afspelen deit, ok befaten un ut’neen setten. So’n wehmödig Trüchkieken achter de ole Tiet ran un so’n Süüfzen, wie schöön dat fröher weer, as dat noch dat eenfache Landleven geev, so wat is bi Peters nich to finnen. De Rutgevers meent in jem ehr Woort achterran, de Baasdörper Krönk, dat weer en Wark, dat över de Tieden steiht. In de plattdüütsche Literatur geev dat so wat bit dorhen gor nich un in de hoochdüütsche Literatur kann se woll mit Walter Kempowski sien Warken vergleken weern.

Born[ännern | Bornkood ännern]

  • Wolfgang Lindow, Paul Selk: Nachwort, in: Peters, Baasdörper Krönk, Husum 1975

Utgaav[ännern | Bornkood ännern]

  • Friedrich Ernst Peters, Baasdörper Krönk, Husum 1975