Axel Gedaschko
.jpg)
Axel Gedaschko (* 20. September 1959 in Hamborg) is en düütschen Politiker von de CDU.
Gedaschko is 1959 in Hamborg boren. Gedaschko is mit 16 in de Junge Union rin un mit 21 in de CDU. Na dat Abitur 1980 in Bookholt hett Gedaschko twee Johr as Tiedsoldaat Deenst bi de Bundswehr in de Röttiger-Kasern in Fischbeek daan. He hett denn Juristeree an de Universitäten Hamborg un Göttingen studeert un 1988 dat Eerste Staatsexamen (mit de Swoorpunkte Verwaltungsrecht un Verwaltungslehr) maakt. Na dat Referendariat in’n Bezirk von dat Oberlandsgericht Celle hett he 1992 dat Twete Staatsexamen maakt.
Von 1993 bet 2000 hett he as juristischen Dezernent för dat Land Neddersassen arbeidt. Bi de Bezirksregerung Lümborg weer he ünner annern för Personalmanagement, Katastrophenschuul un Kommunalopsicht tostännig un harr in’n Bereich Verwaltungsreform den Opdrag bedrievsweertschopliche Stüerungsinstrumente intoföhren. Bi de Gemeen Seevdaal hett he as Baas von dat Referat Ümweltschuul un Entwicklungsplanung een Johr lang en Kommunalpraxis maakt.
In’n November 2000 is Gedaschko as Eersten Kreisraad von’n Landkreis Horborg wählt worrn. 2003 is he in direkte Wahl mit 65,8 % von de Stimmen in’n eersten Wahlgang Landraad von’n Landkreis Horborg worrn un hett sik dorbi gegen dree Gegenkannedaten dörsett. Dat Amt harr he bet 2006, as he von’n Eersten Börgermeester von Hamborg, Ole von Beust, as Staatsraad in de Behöörd för Stadtentwicklung un Ümwelt beropen worrn is.
In’n Januar 2007 is Gedaschko as Nafolger von Michael Freytag, de in dat Finanzressort wesselt is, sülvs Senater un Präses von de Behöörd för Stadtentwicklung un Ümwelt worrn. In de eerste swart-gröne Landsregerung in de Bundsrepublik Düütschland güng dit Ressort an’n 7. Mai 2008 denn aver an Anja Hajduk von de GAL. Gedaschko is denn as Nafolger von Gunnar Uldall Präses von de Behöörd för Weertschop un Arbeid worrn.
Mit de Wahl von Christoph Ahlhaus as ne’en Eersten Börgermeester von Hamborg an’n 25. August 2010 hett Gedaschko denn dat Amt afgeven.
He is an’n 1. Februar 2011 Präsident von’n GdW Bundsverband düütsche Wahnungs- un Immobilienünnernehmens worrn.
Gedaschko is in’t Ehren- un Nevenamt ünner annern ok Vörsitter von’n Verwaltungsraad von de Düütsche Entwicklungshülp för sozial Wahnungs- un Siedlungswesen, Vörsitter von dat Kuratorium von dat Europääsche Bildungszentrum von de Wahnungs- un Immobilienweertschop, Liddmaat in dat Verbandsgremium Hannel von de Schufa Holding AG, Liddmaat von’n Biraad von de Techem GmbH un Liddmaat von’n Biraad von’n Vereen Naturschutzpark Lümbörger Heid.
Siet 2010 is Gedaschko in twete Eh verheiraadt. He hett twee Kinner ut siene eerste Eh.
Schriften
[ännern | Bornkood ännern]- Gaus/Gedaschko/Raab: Verwaltungsrecht für Praxis und Referendariat. 6. Oplaag, Lümborg 2005
