August Heinrich Oberg

Vun Wikipedia
Zur Navigation springen Zur Suche springen

August Heinrich Oberg (* 22. Juni 1809 in Celle; † 13. März 1872 in Berlin) weer en düütschen Jurist.

Oberg is 1809 as Söhn von Justine Philippine, borene Schümann (30. Mai 1786-27. Dezember 1844), un Ludolf Albrecht Heinrich Oberg (30. Dezember 1767-31. Mai 1828) in Celle boren. He hett an de Universität Göttingen Juristeree studeert. 1831 hett he mit siene Arbeit De ordine quo constitutionum codex quem in corpore iuris habemus compositus sit en Pries wunnen, den de Juristenfakultät von de Universität Göttingen utlaavt harr.

Na dat Studium is he Auditer in Reinhusen un Auditer un Assesser bi de Justizkanzlie Stood worrn.

He is 1846 Justizraad in Hilmssen worrn un is von’n 23. März 1849 bet to’n 20. Mai 1849 Afornten von de Natschonalversammlung för den 8. Wahlkreis Hannover in Hilmssen ween. 1852 is he Viezdirekter von dat Obergericht Ostroe worrn un keem 1855 as Viezdirekter an dat Obergericht Stood. Nadem Prüßen 1867 dat Königriek Hannover annekteert harr, is Oberg as Viezpräsident an dat Appellationsgericht Ratibor versett worrn. Dat hett en Kontroverse in’t Prüüßsche Aforntenhuus utlööst, vonwegen dat se sik nich eenig weren, wat dat mit dat Gesett un de Verfaten övereen is, wenn en hannöverschen Richter in ole prüüßsche Rebeden as Richter insett warrt. Oberg hett den Richterposten aver behollen. Noch in’t sülve Johr is he as Viezpräsident an dat Oberappellationsgericht Berlin versett worrn. De Präsident von dat Gericht, Adolph Leonhardt, is 1867 Justizminister worrn un so is Oberg glieks to’n Präsident von dat Gericht oprückt.

He hett an’n 25. September 1837 in Reinhusen Helene Louise Charlotte Sophie Niemeyer (31. Oktober 1814-9. August 1859) freet. De beiden harrn de Kinner Albrecht Hans (* 2. August 1838), Helene Louise Philippine (* 9. Mai 1841), Bodo (25. Mai 1843-üm 1930), Gertrud Auguste Julie Eleonore (18. Februar 1847-15. September 1909) un Carl Joseph Gustav Alexander (* 16. September 1853).

Warken[ännern | Bornkood ännern]

  • De ordine quo constitutionum codex quem in corpore iuris habemus compositus sit. 1831