Argeaden

De weg vun de Argeaden: vun Argos över Peloponnesos nah Makedonien.

De Argeaden ( Ooldgr.: οἱ Ἀργεάδαι hoi Argeádai) weern en Huus vun Könige in Makedonien. Se regeern in de öllere Tied bit hen to den Tied vun de Klassik. Se grünnen dat Königriek vun Makedonien in'n Norden vun Grekenland. De leste König ut dat Argeaden-Huus is 306 v. Chr. sturven. Se vertellen, se stammen vun den Halfgott Herakles af un weern vörmols herkamen ut de Polis Argos (vundeswegen de Naam Argeaden). Sunnerlich bekannte Maten ut düsse Familie weern Philipp II., de dat henkregen harr, de Greken unner to kriegen, un den sien Söhn Alexander de Grote, de dat unbannige Perserriek innehmen konn un so en Weltriek up'e Been stellt hett. Dat Huus vun de Argeaden is utsturven in de Tied vun de Diadochen-Kriege, as Alexander den Groten siene Suster Kleopatra in Sardis in'n Updrag vun Antigonos I. Monophtalmos an'e Sieten maakt wurrn is. Dor woll se just utbüxen na Ägypten hen un Ptolomaios I. siene Fro weern. De leste legitime Herrscher up Makedonien sien Thron weer Alexander den Groten un den siene Fro Roxane ehr Söhn Alexander IV.. He is vun Kassander an'e Siet maakt wurrn. En annern Prinz, de ok up'n Thron wull, weer Herakles, en illegitimen Söhn vun Alexander den Groten un en Fro mit Naam Barsine, de ut Persien stamm. He is vun Polyperchon dood maakt wurrn.

Köninge ut dat Huus vun de Argeaden

• Karanus 808-778 v.Chr.
• Koenus
• Tyrimmas
• Perdikkas I. 700-678 v.Chr.
• Argaeos I. 678-640 v.Chr.
• Philipp I. 640-602 v.Chr.
• Aeropos I. 602-576 v.Chr.
• Alcetas I. 576-547 v.Chr.
• Amyntas I. 547-498 v.Chr.
• Alexander I. 498-454 v.Chr.
• Perdikkas II. 454-413 v.Chr.
• Archelaos I. 413-399 v.Chr.
• Krateros I. 399 v.Chr.(nich ut dat Huus vun de Argeaden)
• Orestes un Aeropos II. 399-396 v.Chr.
• Archelaos II. 396-393 v.Chr.
• Amyntas II 393 v.Chr.
• Pausanias 393 v.Chr.
• Amyntas III. 393 v.Chr.
• Argaeos II. 393-392 v.Chr.
• Amyntas III. (wedder) 392-370 v.Chr.
• Alexander II. 370-368 v.Chr.
• Ptolemaios I. 368-365 v.Chr.
• Perdikkas III. 365-359 v.Chr.
• Amyntas IV. 359-359 v.Chr.
• Philipp II. 359-336 v.Chr.
• Alexander de Grote 336-323 v.Chr.
  • Antipater, Regent vun Makedonien 334-319 v.Chr.
• Philipp III. Arridaios 323-317 v.Chr.
• Alexander IV. 323-310 v.Chr.
  • Perdikkas, Regent vun Makedonien 323-321 v.Chr.
  • Antipater, Regent vun Makedonien 321-319 v.Chr.
  • Polyperchon, Regent vun Makedonien 319-317 v.Chr.
  • Kassander, Regent vun Makedonien 317-306 v.Chr.