Ardipithecus

Vun Wikipedia
Ardipithecus
Düsse Knakenresten sünd vun den Ardipithecus kaddaba funnen wurrn.
Systematik
Ornen: Primaten
Ünnerornen: Dröögnesenapen
Böverfamilie: Ooltweltapen (Catarrhini)
Familie: Minschenapen (Hominidae)
Tribus: Hominini
Geslecht: Ardipithecus
Wetenschoplich Naam
Ardipithecus
White et al., 1995

Ardipithecus is de Naam vun en Geslecht vun den Tribus Hominini mank de Familie vun de Minschenapen un warrt to de eersten Vöröllern vun den hüdigen Minschen rekent. Man to dat Geslecht Homo warrt he nich tellt. Mank de Minschenapen höört he to de utstorvene Grupp vun de Australopithecina. De Ardipithecus hett leevt vör 5,7 bit 4,4 Millionen Johren in de Tieden vun dat bövere Miozän bit to dat unnere Pliozän. As dat bither to utsütt, höört dor twee Aarden to:

Ardipithecus ramidus is funnen wurrn in Äthiopien. 1994 is he vun siene Entdeckers toeerst Australopithecus ramidus nömmt wurrn,[1] man al 1995 hett desülvige Forschergrupp em avers unner den ne'en Naam för dat Geslecht as Ardipithecus an de Siet vun den Australopithecus henstellt.[2]

Ardipithecus kadabba is 2001 vun den Minschen, de em funnen hett, toeerst beschreven wurrn as en Unneraard vun Ardipithecus ramidus. Dor harr he den Naam vun Ardipithecus ramidus kadabba bi weg.[3] 2004 is he denn avers as egen Aart an de Siet vun Ardipithecus ramidus henstellt wurrn.[4] Man dat is ok seggt wurrn, dat Ardipithecus, Sahelanthropus un Orrorin to densülvigen Formenkrink tohören doot un amenne - wenn noch annere Fundstücken tokamen sünd- womööglich to en eenzig Geslecht tellt weern könnt.

De Ecktöhn wiest en primitivern Bruuk, as bi de hüdigen Minschen. Mööglicherwiese is Ardipithecus kadabba ehr mit den hüdigen Chimpansen verwandt, as mit den Minschen.

Vunwegen de Maten vun de Knaken kann een dor vun utgahn, dat de Ardipithecus-Aarden so groot ween sünd, as hüdige Chimpansen. De Töhn vun Ardipithecus ramidus seht so ut, as wenn he liekup lopen weer. Dat bringt Problemen mit de hüdigen Theorien dor över, wie dat bi de Minschenordigen losgüng mt dat Liekuplopen. Denn dat is an to nehmen, dat de Ardipithecus in schaddenrieke Woolden leevt hett un nich in en Savanne. Man dat Liekuplopen schall nu just in de Savannen vun Vördeel ween hebben un dor ok losgahn hebben.

Belegen[ännern | Bornkood ännern]

  1. Tim White, Gen Suwa, Berhane Asfaw: Australopithecus ramidus, a new species of hominid from Aramis, Ethiopia. Nature 371, S. 306-312, 1994
  2. Tim White, Gen Suwa, Berhane Asfaw: Ardipithecus ramidus, a new species of early hominid from Aramis, Ethiopia. Nature 375, S. 88, 1995
  3. Yohannes Haile-Selassie: Late Miocene hominids from the Middle Awash, Ethiopia. Nature 412, S. 178-181, 2001
  4. Yohannes Haile-Selassie, Gen Suwa, Tim White: Late Miocene Teeth from Middle Awash, Ethopia, and early hominid dental evolution. Science 303, S. 1503-1505, 2004