Minschenapen

Gorillas sünd de gröttsten Minschenapen un ok de gröttsten Primaten, de dat hüdigendags gifft.

De Minschenapen (wetenschopplich Hominidae, fröher Pongidae) – sünd en Familie mank de Primaten. Se weert mit de Gibbons tohopen to de Böverfamilie vun de Minschenordigen tellt. To'n Unnerscheed vun de Gibbons (Lüttje Minschenapen) weert se ok Grote Minschenapen nömmt. Dor höört de veer Geslechter vun de Orang-Utans, Gorillas, Schimpansen un Minschen mit seven Aarden to. Wat de Paläontologie angeiht, höört ok den Minschen un de annern Geslechter ehre jungsten Vöröllern mit to de Minschenapen mit to. De minschlichen Vöröllern hefft in de Wetenschop den Naam vun Hominini. Dat de Minsch mit siene utstorvenen Vöröllern hüdigendags to de Minschenapen rekent warrt un nich mehr as egen Familie ankeken warrt, as fröher, liggt an Kennissen ut de Stammgeschicht. Dor is rutkamen, dat de Chimpansen un Gorillas neger verwandt sünd mit den Minschen, as mit den Orang Utan. Minschen gifft dat allerwegens up'e Eer, man de annern Minschenapen kaamt bloß in de Tropen in Afrika un in Süüdoostasien vör. Wat de Tokumst angeiht, sünd se all in Gefahr.

Systematik

Minschenapen mank de Primaten

Wie de Minschenapen un ehre Susterfamilie mit de annern Primaten verwandt sünd, kann een hier sehn:

Primaten (Primates)

  ├──Nattnesenapen (Strepsirrhini)
  └──Dröögnesenapen (Haplorrhini)
       ├──Koboldmakis (Tarsiiformes)
       └──Apen an sik (Anthropoidea oder Simiiformes)
            ├──Neeweltapen (Platyrrhini)
            └──Ooltweltapen (Catarrhini)
                 ├──Steert-Ooltweltapen (Cercopithecoidea)
                 └──Minschenordige (Hominoidea) 
                        ├─ Gibbons (Hylobatidae)
                        └─ Minschenapen (Hominidae)

De Systematik mank de hüdigen Minschenapen

De hüdigen Minschenapen deelt sik in veer Geslechter un seven Aarden mit en Reeg vun Unneraarden:

• Geslecht Orang-Utans (Pongo)
  • Borneo-Orang-Utan (Pongo pygmaeus, twee oder dree Unnerarden)
  • Sumatra-Orang-Utan (Pongo abelii)
• Geslecht Gorillas (Gorilla)
  • Westlichen Gorilla (Gorilla gorilla mi de Unnerarden Westlichen Siedlandgorilla un Cross-River-Gorilla)
  • Ööstlichen Gorilla (Gorilla beringei mit de Unnerarden Ööstlichen Siedlandgorilla un Barggorilla)
• Geslecht Schimpansen (Pan)
  • Gemeenen Schimpansen (Pan troglodytes mit veer Unnerarden)
  • Bonobo oder Dwargschimpansen (Pan paniscus)
• Geslecht Homo
  • (Modernen) Minschen (Homo sapiens)