Afrikaansche Swatte Aante
| Afrikaansche Swatte Aant(e) | ||||||||||||||||
|---|---|---|---|---|---|---|---|---|---|---|---|---|---|---|---|---|
 | ||||||||||||||||
| Systematik | ||||||||||||||||
| ||||||||||||||||
| Wetenschoplich Naam | ||||||||||||||||
| Anas sparsa | ||||||||||||||||
| Eyton, 1838 |
De Afrikaansche Swatte Aant(e) (Anas sparsa) is en Aantenvagel un warrt to de Swemmaanten torekent. Dor höört he wedder to de Aanten an sik mit to. De Aart gifft dat bloß man in Afrika. Uptreden deit se in twee Unneraarden. De Nominatform is de Südafrikaansche Swatte Aante (Anas sparsa sparsa). Se is in’n Süden vun Afrika tohuse. Denn gifft dat noch de lüttjere un hellere Abessiensche Swatte Aante. Noch en annere Form is fröher Westafrikaansche Swatte Aante (Anas sparsa maclatchyi) nömmt wurrn. Se warrt avers hüdigendags nich mehr as Unneraart ankeken, man as en Variante vun de Abbessiensche Swatte Aante, de for sik in’n Regenwoold vun de annern Aanten vun düsse Aart afscheedt is.[1]
Kennteken
[ännern | Bornkood ännern]De Swatte Aante is an un for sik nich swatt, man dunkerbruun. Up dat Lief fallt witte oder cremefarvte Teken up. De Afrikaansche Swatte Aante warrt 50 bit hen to 55 cm lang. De Waarten weegt in’n Döörsnitt 1086 g, de Seken bi 914 g.[2] Bi düsse Aart verscheelt Waart un Aante sik nich. Ok over dat Johr hen ännert se ehr Fedderkleed nich. Rusen doot de Aanten in Süüdafrika twuschen Oktober- un Dezembermaand. Eerst smiet de de groten Feddern an’e Flunken af, achterna kummt dat Rusen vun Steert- un Lüttfeddern. In de Ruseltied könnt de Aanten 25 bit 26 Dag lang nich flegen. Vun Februar bit Maimaand weert noch mol de Lüttfeddern wesselt.[3]
Wo se vorkamen deit
[ännern | Bornkood ännern]De Afrikaansche Aaante leevt in Afrika süüdlich vun de Sahara, vun Äthiopien in’n Osten bit an de Süüdspitz vun den Kontinent. In Gabun un Kamerun gifft dat Populatschonen ganz for sik. In Angola un Namibia un in’n Westen vun Äquatorialafrika is de Aart man roor. De Süüdafrikaansche Swatte Aante is nich wieter na Norden to to finnen, as man bit den Süden vun Simbabwe. De Abbessinsche Swatte Aante kummt in Gabun, Kamerun, Angola, de Demokraatsche Republiek Kongo, Oostafrika, Sudan un Äthiopien vor.[4] De Bestand warrt taxeert up 1.000 bit 5.000 Vagels for Gabun, 100 for dat Hoochland vun Conakry un 1.000 bit 5.000 for dat Hoochland vun Kamerun. In Äthiopien sien Hoochland leevt 2.000 bit 10.000 Afrikaansche Swatte Aanten, in Oostafrika sünd dat alltohopen 10.000 bit 25.000 Aanten. In üüdafrika liggt de Bestand twuschen 20.000 un 50.000 Aanten.[5]
Wo se leven deit
[ännern | Bornkood ännern]De Afrikaansche watte Aante is meist an Ströme to finnen, wo dat Water gau fleten deit. Sunnerlich hollt se sik an Ströme in’t Hoochland un in Regionen mit Woold up. Hen un wenn is se ok an Afsnitte vun Ströme to sehn, wo dat ruhiger togeiht oder an stille Waters nich wiet af vun’n Stroom. In Süüdafrika siedelt se meist an Waters, de twuschen dree un 14 m breet un bi een Meter deep sünd. In Abessinien leevt se bit up en Hööchde vun 4.000 m over NN.[6] In de Brödeltied besett se en Afsnitt vun en Stroom un verdeffendeert den gegen all Aartgenoten. Jedeen Dag kuntrolleert dat Paar den ganzen Afsnitt, de em töhöörn deit. De Paare hangt bannig an’anner, man buten de Brödeltied sünd se ok alleen an to drepen. Wohrschienlich is avers doch, datt de Paare en Reeg vun Johre tosamen blievt.[7] Afrikaansche Swatten Aanten blievt dat ganze Johr in ehr Revier un treckt nich weg. Dor höört se to de Standvagels mit to. Bloß in de Tied, wenn se rusen doot, billt de Aanten, tohopen mit annere Swatte Aanten vun umto, lüttje Trupps.
Wat se freten deit
[ännern | Bornkood ännern]Afrikaansche Swatte Aanten nehmt ehr Freten up an de Uppersiet vun dat Water. Man se grünnelt ok un duukt dor Snavel, Kopp un Hals bi unner, wenn se in Stroomsnellen Steene unnersöökt. To’n gröttern Deel fritt de Aante lüttje Deerter, as Watersniggen, Insekten, lüttje Fische un Warvellose Deerter.[8] De Aante is bi Dag unnerwegens.
Wie se sik vermehren deit
[ännern | Bornkood ännern]De Brödeltied verscheelt sik in de allerhand Gemarken, wo se to finnen is. Ganz in’n Süden geiht se vun Juli- bit Dezembermaand mit den Hööchdepunkt in’n September. In Simbabwe un Sambia bröödt se vun Mai bit August. De Nester weert normolerwiese up en Sandbank an’t Över anleggt. Ganz hen un wenn mol brott se avers ok in holle Böme. De Nestkuhlen is oorntlich mit Dunen utstaffeert. De Eier sünd blassgeel un glimmert. De Aante leggt veer bit acht Eier in’n Afstand vun je 24 Stunnen. Bröden deit bloß man dat Seken. Dat Bröden duert 25 Dage. De Küken weert ok alleen man vun de Aante föhrt.[9] Dat duert negen bit tein Weken, denn könnt de jungen Aanten flegen.
Belege
[ännern | Bornkood ännern]- ↑ Kolbe, S. 205
- ↑ Kear, S. 507
- ↑ Kolbe, S. 206
- ↑ Kear, S. 507
- ↑ Kear, S. 507
- ↑ Kolbe, S. 206
- ↑ Kear, S. 507
- ↑ Kolbe, S. 207
- ↑ Kear, S. 509
Literatur
[ännern | Bornkood ännern]- Janet Kear (Rutg.): Ducks, Geese and Swans. Oxford University Press, 2005, ISBN 0198546459
- Hartmut Kolbe: Die Entenvögel der Welt. Ulmer Verlag, 1999, ISBN 3-8001-7442-1