(45) Eugenia
| (45) Eugenia | |
| Egenschoppen vun’n Orbit (Simulatschoon) | |
|---|---|
| Orbitklass | Hööftgördel |
| Grote Halfass | 2,720 AE |
| Perihel — Aphel | 2,491 — 2,949 AE |
| Bahnexzentrizität | 0,0841 |
| Bahnnegen gegen de Ekliptik | 6,604 ° |
| Ümlooptiet | 4,49 a |
| middlere Bahnsnelligkeit | 18,0 km/s |
| Physikaalsch Egenschoppen | |
| Dörmeter | 202,3 km |
| Masse | (5,69 ± 0,1) · 1018 kg |
| Middlere Dicht | 1,12 ± 0,10 g/cm³ |
| Rotatschoonsduer | 5,699 h |
| Albedo | 0,045 |
| Historie | |
| opdeckt vun | H. M. S. Goldschmidt |
| an’n | 27. Juni 1857 |
| in | Paris |
| Annere Beteken | 1941 BN |
(45) Eugenia is en Asteroid ut den Hööftgördel, de an’n 27. Juni 1857 vun den düütsch-franzööschen Astronom Hermann Goldschmidt in Paris opdeckt worrn is. He höört mit en Dörmeter vun mehr as 200 km to de gröttsten in’n Hööftgördel.
Opdecken un Naam
[ännern | Bornkood ännern]Goldschmidt hett den Asteroid mit en Teleskop von sien Wahnung in’t sösste Stockwark ut in Paris opdeckt. De vörlöpige Bereken vun de Ümloopbahn weer in Berlin vun Wilhelm Foerster vörnahmen, de den Asteroid in’n Juli 1857 dreemol beobacht harr. Bit 2017 weer (45) Eugenia al över 2700 mol vun de Eer ut mit Teleskopen beobacht un utforscht.
Nöömt is de Asteroid na Eugénie de Montijo, de Ehfro vun Napoleon III.
Egenschoppen
[ännern | Bornkood ännern](45) Eugenia is unregelmatig formt mit de ungefähren Grött 232 × 193 × 161 km³. De Asteroid höört to den Spektraltyp F un wiest en düstere, kohlenstoffrieke Böverflach op. Sien Albedo is dorüm mit 0,04 bannig lütt. De Dicht liggt bi ruchweg 1,12 g/cm³, wat ok bannig wenig is. Dorüm is antonehmen, dat (45) Eugenia keen fasten Körper is, man en Rubble Pile, de sik ut lose Stoffpartikels un Felschören tohopensett.
Dat Eugenia–Dreefacksystem
[ännern | Bornkood ännern]An’n 6. Oktober 1999 is bi den Asteroid en Maand opdeckt worrn de na de Geschicht vun Antoine de Saint-Exupéry as Petit-Prince (op platt: „de lütte Prinz“) nöömt worrn is. De Naam weer ok to Ehren vun Napoléon Eugène Louis Bonaparte utwählt, den eenzigen Söhn vun de Naamsgeversche vun den Asteroid. De Maand is ruchweg 7 km groot un kreist in en Afstand vun 1.164 km in 4,716 Daag üm (45) Eugenia.
In’n März 2007 is noch en tweeten Maand opdeckt worrn, de en Grött vun üm un bi 5 km hett. He driggt den vörlöpigen Naam S/2004 (45) 1 un weer op Biller ut dat Johr 2004 funnen. En offiziellen Naam gifft dat noch nich. De lüttere Maand kreist in en Afstand vun 611 km un bruukt för en Ümloop 1,793 Daag[1].