Zensus

Vun Wikipedia

Bi en Zensus warrt faststellt un tellt, woveel Minschen in en Rebeet leevt. Todem warrt mehrsttiets ok noch annere statistische Daten as Öller, Slecht etc. mit uttellt.

En Zensus warrt vun en Staat per Gesett dörföhrt, faken in Tietrüüm vun teihn Johr. De Lüüd hebbt dorbi de Plicht Utkunft to geven. De Idee achter den Zensus is, dat de Regeren, de Staat un de Verwalten naue Tallen bruukt över de Tosamensetten un Opbo vun de Sellschop üm ehr Aktivitäten un Investitschonen beter planen to könen.

Faken warrt tosätzlich to de Zensus, de alle teihn Johr maakt warrt un bi de alle Inwahners fraagt warrt, elk Johr noch en Mikrozensus dorföhrt. Dorbi warrt blots en lütt repräsentativ Deel vun de Inwahners fraagt. Wiel de Fehlerquoot mit de Johren anstiggt, is na en poor Johren wedder en richtig Zensus nödig.

Historie[ännern | Bornkood ännern]

De öllsten Zensus, vun de wi weet, weren in de Antike dörföhrt. To'n Bispeel warrt in de Bibel en poor Maal vun en Zensus dör de Römers snackt. Vun de Römers kummt ok de Begreep Zensus. De Censoren weren tostännig, de Stüern för de Börgers fasttosetten un müssen dorför ok weten, woveel Börgers dat geev. Ok in China geev dat al fröh Zensus. Twee Resultaten sünd överlevert: Na disse Tallen leven in't Johr 2 in't China vun de Han 57,5 Millionen Minschen. In't Johr 140 weren dat blot noch 48 Milionen Minschen.

Düütschland[ännern | Bornkood ännern]

De eerste Zensus in’t hele Düütsche Riek weer 1895.

De Zensus vun’n 1. Dezember 1900 tell 56.345.014 Inwahners. Dat weer en Towass bi de Inwahnertall vun 7,78 Perzent in fief Johr.

In Düütschland weer de letzte Zensus 1987. Na Protesten vun Datenschützers wörr de för 1980 un 1983 plaante Zensus tweemal verschaven. Nadem geev dat keen Zensus mehr in Düütschland.

Zensus in de Bundsrepublik Düütschland[ännern | Bornkood ännern]

  • 13. September 1950
  • 6. Juni 1961
  • 27. Mai 1970
  • 25. Mai 1987

Zensus in de Düütsche Demokraatsche Republik[ännern | Bornkood ännern]

  • 31. August 1950
  • 31. Dezember 1964
  • 1. Januar 1971
  • 31. Dezember 1981

Nedderlannen[ännern | Bornkood ännern]

Den eersten Zensus geev dat 1795 in de Nedderlannen. 1971 weer de letzte. Na Protesten wörr de Zensus 1981 nich mehr utföhrt un 1991 heel afschafft.

Swiez[ännern | Bornkood ännern]

In de Swiez wörrn Zensus vun 1850 an (siet Grünnen vun'n Bundsstaat) in de Regel alle teihn Johr dörföhrt.

Österriek[ännern | Bornkood ännern]

De eerste moderne Zensus weer in't Johr 1869. In Österriek warrt dör de Statistik Austria alle teihn Johr en Zensus dörföhrt. Siet 1951 warrt de Zensus jümmer in de Johren, de mit 1 ennt, afholen. De letzte Zensus weer an'n 15. Mai 2001.

Australien[ännern | Bornkood ännern]

De Zensus in Australien warrt vun dat Austraalsch Statistikbüro (Australian Bureau of Statistics) alle fief Johr dörföhrt. De letzte weer an'n 7. August 2001.

Brasilien[ännern | Bornkood ännern]

De brasiliaansche Zensus warrt vun dat Brasiliaansche Institut för Geografie un Statistik (Instituto Brasileiro de Geografia e Estatistica) alle teihn Johr dörföhrt. De letzte weer 2000.

Kanada[ännern | Bornkood ännern]

De kanaadsche Zensus warrt vun Statistik Kanada (Statistics Canada) alle fief Johr dörföhrt. De letzte weer 2001.

Frankriek[ännern | Bornkood ännern]

De Zensus in Frankriek warrt vun't Natschonale Institut för Statistik (Institut National de la Statistique et des Études Économiques) dörföhrt.

Italien[ännern | Bornkood ännern]

De Zensus in Italien warrt vun't Natschonale Institut för Statistik (Istituto Nazionale di Statistica) alle teihn Johr dörföhrt. De letzten weren 1971, 1981, 1991 un 2001.

Neeseeland[ännern | Bornkood ännern]

De Zensus in Neeseeland warrt vun Statistik Neeseeland (Statistics New Zealand) alle fief Johr dörföhrt. De letzte weer 2001.

Portugal[ännern | Bornkood ännern]

De Zensus in Portugal warrt vun't Natschonale Institut för Statistik (Instituto Nacional de Estatistica) alle teihn Johr dörföhrt. De letzte weer 2001.

Russland/Sowjetunion[ännern | Bornkood ännern]

De eerste Zensus in Russland weer 1897 dörföhrt. In de Sowjetunion geev dat 1920, 1926, 1939, 1959, 1970, 1979 un 1989 en Zensus. De eersts Zensus na dat Enn vun de Sowjetunion weer 2002.

Süüdafrika[ännern | Bornkood ännern]

De Zensus in Süüdafrika warrt vun Statistik Süüdafrika (Statistics South Africa) alle fief Johr dörföhrt. Bet hüüt geev dat twee Zensus 1996 un 2001.

USA[ännern | Bornkood ännern]

De Verfaat vun de USA gifft vör, dat alle teihn Johr en Zensus dörföhrt warrn mutt, dat de Afornten vun't US-Repräsentantenhuus dorna fastleggt warrn köönt. Den eersten Zensus geev dat 1790. Siet 1903 is dat US-Zensusbüro (United States Census Bureau) dorför tostännig.

Vereent Königriek[ännern | Bornkood ännern]

De eerste Zensus in dat Vereente Königriek weer 1801. Sietdem geev dat alle teihn Johr (blot nich 1941) en Zensus.

Literatur[ännern | Bornkood ännern]

Jürgen Taeger (Hrsg.): Die Volkszählung. dtv, 1983, ISBN 3-499-15245-2

Weblenken[ännern | Bornkood ännern]