Wapen vun Uganda

Vun Wikipedia
Wesseln na: Navigatschoon, Söök
Coat of arms of the Republic of Uganda.svg

Dat Wapen vun Uganda is dat Natschonalwapen vun den oostafrikaanschen Staat Uganda un wiest en afrikaanschen Schild, de vun en Kob un en Swart Kronenkraan as Schildhollers stütt warrt. De Kob steiht för de rieke Natur vun Uganda un de Kronenkraan is todem dat Natschonalsymbol, dat ok op de Flagg vun Uganda afbillt is.

Op dat Schild sünd en gollen-sülverne Trummel, de för de Kultur vun Uganda steiht, in de Merr en gollene Sünn un baven en sülver-blagen Wellenbalken afbillt. Achter dat Schild sünd twee krüüzte Speren to sehn, de as traditschonelle ugandsche Kampwapen de Wehrhaftigkeit vun dat Land dorstellt.

Dat Schild steiht op en Sockel, de de Landschop vun Uganda, dör de de Nil fleet, dorstellt. Op de linke Siet is en Koffiplant, op de rechte en Boomwullplant to sehn. Neern is en Banderool mit dat Motto „For God and My Country“ („För Gott un mien Land“).

Dat Original vun dat Wapen, dat na de Unafhängigkeit vun Uganda 1962 maakt worrn is, schall Präsident Idi Amin tohoop mit dat Original vun de ugandsche Flagg bi siene Flucht 1979 na Saudi-Arabien mitnahmen hebben un dor is dat woll wegkamen.

Dat Wapen warrt siet den 21. September 1962 föhrt. Dat Wapen vun dat britische Protektorat Uganda weer vörher en rund Afteken, dat op gollen Grund enen Kronenkraan wiest.