Walter Riester

Vun Wikipedia
Wesseln na: Navigatschoon, Söök

Walter Riester (* 27. September 1943 in Kaufbeuren) is en düütschen Politiker vun de SPD. He weer vun 1998 bit 2002 Bundsminister för Arbeit un Sozialornen in’t Kabinett Schröder I.

Leven un Beroop[ännern | Bornkood ännern]

Na’n Besöök vun de Volksschool hett Riester vun 1957 bit 1960 en Utbilln to’n Fliesenlegger maakt. Dissen Beroop hett he bit 1969 utöövt un in dat Johr de Meesterproov afleggt. Bit 1970 hett he denn de Akademie vun de Arbeit in Frankfort an’n Main besöcht. Dorna weer he bit 1977 Jöögdsekretär bi’n DGB-Landsbezirk Baden-Württemberg un wessel denn na de IG Metall in de Verwaltenssteed Geislingen an der Steige. Dor weer he eerst een Johr Sekretär un bit 1979 de Tweete Bevullmächtigte.

Vun 1980 bit 1988 Weer Riester Bezirkssekretär bi’n IG Metall Bezirk Baden-Württemberg, bit he in dat Johr de Nafolg vun Ernst Eisenmann as Bezirksleider vun de IG Metall Baden-Württemberg annahmen hett. Vun 1993 bit 1998 weer he de tweete Bundsvörsitter vun de IG Metall un in de glieken Tiet Liddmaat in de Opsichtsrööt vun verscheden düütsche Ünnernehmen, as Bosch, Daimler-Chrysler, Thyssen, Audi u.a.[1]

Na sien Tiet as Liddmaat vun’n düütschen Bundsdag weer he Referent bi verscheden Ünnernehmen ut den Twieg vun de Finanzdeestleisten un is Opsichtsraatsliddmaat vun ArcelorMittal Bremen[2]. To’n 1. Oktober 2009 warrt Riester Opsichtsraat vun den Finanzdeenstleister Union Asset Management Holding.

Riester hett en Fro un twee Kinner.

Partei[ännern | Bornkood ännern]

In de SPD is Riester 1966 inpeddt. Siet 1998 sitt he in’n Parteivörstand.

Afordent in’n Bundsdag[ännern | Bornkood ännern]

Walter Riester is siet 2002 Liddmaat in’n Düütschen Bundsdag. Dorin is he siet November 2005 de Viez-Spreker vun de Arbeitsgrupp „Weertschopliche Tosamenarbeit un Entwickeln“ vun de SPD-Bundsdagsfrakschoon. He vertritt den Wahlkreis Göppingen, de dat glieke Rebeet afdeckt as de Landkreis Göppingen, un is jümmer över de Landslist Baden-Württemberg in den Bundsdag rinkamen. He hett künnig maakt, 2009 nich mehr för’n Bundsdag to kandideeren.

Apentlich Ämter[ännern | Bornkood ännern]

An’n 27. Oktober 1998 is Walter Riester Bundsminister för Arbeit un Sozialornen in de Bundsregeeren ünner Bundskanzler Gerhard Schröder worrn. Mit sien Naam is de in sien Amtstiet utklamüsterte Riester-Rente verknütt. Dat is en Öllersvörsorg, de staatlich föddert warrt. Sien Ministerium is na de Bundsdagswahl 2002 oplöst worrn. De Opgaven sünd op’t Bundsministerium för Weertschop un Arbeit un op’t Bundsministerium för Gesundheit un Soziale Sekern opdeelt worrn. Riester is dorüm an’n 22. Oktober 2002 ut de Bundsregeeren utscheedt.

Weblenken[ännern | Bornkood ännern]

Borns[ännern | Bornkood ännern]

  1. http://www.walterriester.de/lebenslauf.shtml (Stand 28. Mai 2008)
  2. http://www.abgeordnetenwatch.de/walter_riester-650-5818---nebentaetigkeiten.html Stand 25. März 2009.