Walisische Spraak

Vun Wikipedia
Wesseln na: Navigatschoon, Söök
(Cymraeg)
Warrt snackt in: Wales (Vereenigt Königriek) un Chubut-Daal (Argentinien)
Sprekertall: mehr, as 750.000:

Wales 611.000, England 133.000, Chubut-Daal 25.000, Kanada 3.160, USA 2.655, Neeseeland 1.155, Australien 1.060

Spraakfamilie:
Offiziellen Status
Amtsspraak in: Wales
Spraakkoods
ISO 639-1: cy
ISO 639-2 (B): wel
ISO 639-2 (T): cym
ISO 639-3: cym
SIL: CRN

Walisisch (ok kymrisch; Egennaam Cymraeg [[kəmˈrɑːɨɡ]] oder – mit Artikel – y Gymraeg [[ə ɡəmˈrɑːɨɡ]]; engelsch: Welsh) is en p-keltsche Spraak. Tohopen mit de Bretoonsche Spraak un dat Koornsche maakt se de britannsche Unnergrupp vun de Keltschen Spraken ut. Se warrt in Wales vun um un bi 750.000 Minschen snackt. Dor is se de keltsche Spraak mit, de an'n meisten as Muddersprake snackt warrt. In Wales is se, blangen Engelsch, Amtssprake un Schoolspraak. Dat gifft twee Dialekte, een in'n Norden un een in'n Süden. Anners as de Bretoonsche Spraak is dat Kymrische noch heel levennig. Dat warrt jummers noch vun allerhand Kinner as Mudderspraak lehrt un in all Gruppen vun de Sellschop snackt. De Utsichten, datt de Spraak blifft, sund tähmlich goot, vunwegen datt Kymrisch noch in Deele vun dat Land snackt warrt, de tosamenhangen doot. Sunnerlich in'n Norden sund de Snackers vun Kymrisch noch in de Mehrheit, mit en Andeel vun bit to 70 %. Over de lesten tein Johre is de Andeel vun de Kymrisch-Snackers in Prozent liek groot bleven. Vördem weer he langsam, man stadig bargdal sackt. De afslute Tahl vun Kyrisch-Snackers is sogor woller grotter wurrn. Sietdem, datt in Wales en egen Parlament up'e Been kamen is, de National Assembly for Wales / Cynulliad Cenedlaethol Cymru warrt noch mehr maakt, datt dat mit de Spraken wedder beter loppt.

As dat Volk in't Johr 2001 tellt wurrn is, is rutkamen, datt bi 21 % vun de Walisers ehre egene Sprake snacken könnt. Deelwiese mit de Sprakle umgahn (t.B. blot man lesen) könnt bi 8 % vun de Inwahners. Datt dat mit dat Walis’sche so goot utsehn deit, liggt sunnerlich dor an, datt dat Engelsche in de Städer vun Wales snackt warrt, wieldes up dat platte Land, wo man nich so veel Lüde leven doot, wiethen walis’sch snackt warrt. Buten vun Wales warrt Kyrisch in dat Chubut-Daal in de Provinz Chubut in Patagonien in Argentinien snackt.

Wo hüdigendags Walis’sch snackt warrt.