Voyager Golden Record

Vun Wikipedia
Wesseln na: Navigatschoon, Söök
Hüll vun de Golden Schallplatt mit interstellar Bruuksanwiesen
Datenplatt mit Bild- un Tooninformatschonen

De Voyager Golden Record is en Datenplatt mit Bild un Audioinformatschonen, de an de beiden 1977 losschaten interstellaren Ruumsonden Voyager 1 un Voyager 2 anbrocht worrn is. Da is maakt worrn, wiel man de Hapen harr, die Sonden künnen op jemehrn Weg mit annere intelligente Leevformen in Kontakt kamen. Mit de Platt wull man wiesen, dat dat de Minschen gifft un woneem in’n Weltruum man jem finnen kan – ok wenn de Wohrschienlichkeit för so en Begegnen düchtig lütt is, un de Minschen denn villicht all gor nich mehr sünd. Man de Platt schall woll 500 Millionen Johr in Orden blieven un kann denn wenigstens dorvun tügen, dat de Minschen inst op de Eer leevt hebbt.

Op ehr Hüll (Golden Record Cover) is en Verkloren ingraveert, de wiesen schall, woans de Platt bruukt warrt, dat heet, woans man de Daten dorop lesbor maken kann. De nödigen Tietangaven sünd binär angeven un beteht sik op en Waterstoff-Atom, dat ok mit dorstellt is. Butendem is ok de Positschoon von de Eer in Afhangigkeit vun 14 Pulsaren un de Mitt vun de Melkstraat angeven, jüst so, dat ok bi de Pioneer-Plaketten al maakt worrn is.

De Platt is 30 Zentimeter groot un ut vergoldet Kopper herstellt. De Anfang vun de Datenspoor bargt 115 analog spiekerte Biller. De Rest op de Platt besteiht ut Toondaten (Sounds Of Earth). Dorto höört Gröten, de in 55 verscheeden Spraaken snackt worrn sünd. De hoochdüütsche Text is: „Hartlich Gröten an all“. Wieter sünd dorop ünnerscheedlich Töön as Wind, Dunner un Töön vun Beester folgt vun 90 Minuuten utwählte Musik, dorünner ok bekannte Titel vun Johann Sebastian Bach, Wolfgang Amadeus Mozart, Chuck Berry un annere. Bito finnt sik en schreven Naricht vun den dormoligen UN-Generalsekretär Kurt Waldheim un en wietere vun den US-Präsidenten Jimmy Carter: „This is a present from a small, distant world, a token of our sounds, our science, our images, our music, our thoughts and our feelings. We are attempting to survive our time so we may live into yours.“
(op platt: „Dit is en Gaav vun en lütte Welt wiet weg, Bispelen vun uns Töön, uns Forschen, uns Biller, uns Musik, uns Gedanken un uns Geföhlen. Wi haapt, uns Tietöller to överleven, so dat wi joon beleven künnt.“)

Literatur[ännern | Bornkood ännern]

  • Sagan, Drake, Lomberg et.al.: Murmurs of Earth - Warner News Media 1992 (swoor to kriegen, bargt CD-Rom mit Replikat)

Weblenken[ännern | Bornkood ännern]