Voyager 1

Vun Wikipedia
Verloop von de Bahnen von de Voyager-Sonden.
De Ruumsond Voyager.

De Voyager 1 is en US-amerikaansche Ruumsond, de an’n 5. September 1977 – 16 Daag na Voyager 2 – von Cape Canaveral ut mit en Titan IIIE-Centaur-Rakete afschoten worrn is. Ehr Bahn weer so berekend, dat se an ehr eerstet Teel, den Jupiter noch vör de Süstersond ankamen de. Na en eersten Plan schüll Voyager 1 ünner de Beteken Mariner 11 as Deel von dat Mariner-Programm losflegen.

Verloop[ännern | Bornkood ännern]

De eersten Fotos vun’n Planeten Jupiter hett de Sond in’n Januar 1979 maakt. Den lüttste Afstand har se von den Planeten an’n 5. März 1979. To weer se ruch weg 278.000 km wiet weg. As de Jupiter-Mission weer to Ennd weer, haar Voyager 1 meist 19.000 Biller maakt un na Eer funkt. Mit blots 18.640 km is de Sond ok ganz dicht an den Maand Io vörbiflogen. Dorbi künn to’n eersten mal Vulkanismus buten von de Eer nawiest warrn.

Dör de Gravitatschoon von den Jupiter weer de Sond noch wieter gau maakt un hett dorna an’n 12. November 1980 den Saturn in en Afstand von 124.200 km passeert. Ok dor hett Voyager 1 bannig veel Biller maakt. Ünner annern sünd dorbi komplexe Strukturen in dat Ringsystem opdeckt un masse Daten von de Atmosphäär von den Saturn un ok von den Maand Titan sammelt worrn.

Voyager 1 op den Weg ut dat Sünnsystem.

Siet 17. Februar 1998 hett Voyager 1 en grötteren Afstand to de Eer as de Ruumsond Pioneer 10, de all siet 1972 ünnerwegs is un ok den Jupiter besöcht hett. An’n 14. Oktober 2005 hett de Sond all üm un bi 17,2 Mrd. km (115 AE) trüggleggt un weer to 14,5 Mrd. km (97,1 AE) wiet weg von de Sünn. Voyager 1 is dormit dat von Minschen boote Objekt, dat an wietsten von de Eer weg is. Mit en Snelligkeit von ~3,6 AE/a (600.000.000 km/a) betogen op de Sünn flüggt de Sond nu wieter. Dat is üm un bi 17 km/s

De golden Schallplaat Sound of the Earth (Achtersiet).

In en Pressemitdeelen von’n 24. Mai 2005 hett de NASA vertellt, dat Voyager 1 an’n 16. Dezember 2004 as eerstet von Minschen boote Flegtüch dat Termination Shock-Rebeet passert hett un sik nu de Grenz von dat Sünnsystem nöög kummt. Se flüggt nu in dat Rebeet, dat as Heliosheath betekend warrt. De Influss von de Sünn is dor man blots noch lütt. Na de Heliopause schall de Sond na Utkunft von de NASA 2015 henkamen. De wichtigsten Systemen un ok eenige Instrumenten sünd noch jümmer to bruken.

An’n 15. August 2006 hett de NASA bekannt geven, dat de Sond nu 100 AE von de Sünn weg is. Bi disse Snelligkeit künn dat wesen, dat se in de nächsten tein Johr in den interstellarn Ruum ankummt. Man rekend dormit, dat de Kontakt noch bit 2020 hollen warrn kann. Dorna warrt de Radioisotopengenerater nich mehr noog Energie maaken künnen, üm de wichtigen Systemen von de Sond noch to versorgen.

Voyager 1 hett jüst as de Süstersond Voyager 2 ok en golden Schallplaat dorbi mit de Sounds of Earth (platt: Luden von de Eer).

Websteed[ännern | Bornkood ännern]

Voyager 1. Mehr Biller, Videos oder Audiodateien to’t Thema gifft dat bi Wikimedia Commons.