Tautrecken

Vun Wikipedia
Wesseln na: Navigatschoon, Söök
Tautrecken bi’t Militär: U.S. Naval Academy in Annapolis, Maryland

Tautrecken oder Tautehn is en ollen Mannschopssport, bi den twee Mannschoppen jemehr Knööv meten doot. Dorbi tütt an jeed Enn vun’t Tau een Mannschop. Wunnen hett, wokeen de gegnerische Mannschop över de Middellien trecken deit.

Wettstriet[ännern | Bornkood ännern]

Ok in Düütschland warrt Tautrecken bi vele Turnfesten as Wettstriet anboden

Tomeist geiht dat bi’t Tautrecken mehr üm den Spaaß. Man, Knööv, Utduer, Technik un mentale Kraft maakt dorut en richtigen Leistungssport, de natschonal as ok internatschonal vun uttraineerte Athleten bedreven warrt. Jeed Johr finnt internatschonale Wettstrieden statt, in de nich-geraden Johren warrt Europameesterschoppen afhollen un in de geraden Johren Weltmeesterschoppen. Dorbi hebbt de Swiez ünner de Natschonen de Nees vör, tosamen mit de Nedderlannen, Irland, Spanien, Sweden un Düütschland.

In’n Wettkamp staht sik Mannschoppen mit acht Lüüd gegenöver. Dorbi warrt internatschonal na Gewichtsklassen indeelt: Bi de Froonslüüd gifft dat Klassen bit 480 kg, bit 520 kg un bit 560 kg, bi de Mannslüüd gifft dat Klassen bit 520 kg, bit 560 kg, bit 600 kg, bit 640 kg, bit 680 kg, bit 720 kg un över 720 kg.

En Wettkamp besteiht ut en Vör- un en Endrunn. In de Vörrunn mööt all Mannschoppen (in de Grupp) gegenenanner anpedden, wobi bi jeed Poor twee Töög utdragen warrt. De Winner kriggt för en wunnen Tog een Punkt. För de Endrunn warrt na de Punkten ut de Vörrunn de veer besten Mannschoppen bestimmt. De bestriedt denn dat Halffinale. Dorna gifft dat eerst Töög üm de Reeg bit Platz 5. Dorna peddt de Verleres ut de Halffinalen gegenenanner üm Platz 3 an un to’n Sluss is denn dat Finale, bi dat sik de Winners ut dat Halffinale gegenöverstaht. In de Endrunn mut dat bi jeed Poor en Winner un en Verlerer geven. Dat heet, dat hier een drüdden Tog maakt warrn mutt, wenn de Punkten na de beiden eersten Töög utgleken sünd.

De Schoh vun de Athleten dröfft keen Metallspitz hebben, man se dröfft en Metallplaat vun dree Millimeters bargen. De Sportlers hebbt keen Verlööf Handschen to drägen, aver se dröfft Horz op jemehr Hannen maken, üm beter griepen to künnen.

Historie[ännern | Bornkood ännern]

Tautrecken bi de Polizeischool Brannenborg in’n September 1924

Tautrecken is as Wettkamp ut antike Zeremonien un Kultvörgäng tostannen kamen. Henwiesen op den rituellen Oorsprung sünd in Burma, Indien, Borneo, Korea, op Hawaii, in’n Kongo, Niegseeland un Niegguinea funnen worrn. Dat Tautehn deen dormols as Teken för den Kamp twüschen Goot un Böös.

Later hett sik Tautrecken to en sportlichen Wettstriet entwickelt. En Wandmaleree vun’n Merera-ku in Sakkara (Ägypten) wiest dorop hen. In’t antike Grekenland (af ruchweg 500 v. Chr.) is Tautehn vör allen as Training för annere Sportorden maakt worrn. In’t 12. Johrhunnert weern Wettstrieden in’t Tautrecken an’n Hoff vun’n chinees’schen Kaiser afhollen, in’t 13. un 14. Johrhunnert okin de Mongolei un in de Törkie.

In’t westliche Europa kann dat Tautrecken eerst af üm un bi 1000 nawiest warrn, neemlich in skandinavische un germaansche Heldensagen, de vun „dannige Spelen“ berichten doot. In’t 15. un 16. Johrhunnert keem dat Tautrecken na Frankriek un Grootbritannien. To’t Enn vun’t 19. Johrhunnert is de Sport organiseert bedreven worrn. Eerst geev dat enkelte Vereenen, later ok Verbännen. Dorbi weer Tautrecken toeerst as Disziplin vun de Lichtathletik ansehn.

Vun 1900 bit 1920 teel Tautehn to de olympschen Sportorden. Dorna weer dat aver ut dat Programm streken, vun wegen dat dat IOC de Tall vun de Deelnehmers lütter maken wull. As sik de Lichtathletikverbännen nich mehr üm dat Tautrecken scheren deen, hebbt sik unafhangige Vereenen un Landsverbännen billt. 1964 is de Weltverband TWIF (Tug of War International Federation) grünnt worrn. In dat glieke Johr geev dat ok de eersten Europameesterschoppen, wiel de eersten Weltmeesterschoppen 1975 utdragen worrn sünd. Siet 1981 nimmt de Weltverband för’t Tautrecken an’t Programm vun de World Games deel.

Gefohren[ännern | Bornkood ännern]

Dat Tautrecken nich ahn Risiko is, hett sil 1995 wiest, as sik bi en Tautrecken mit 650 junge Paddlöpers in Westernohe (Rhienland-Palz) en traagschen Unfall todragen hett. Dorbi is al na 30 Sekunnen en Tau tweireten, dat för den Sport överhaupt nich dögen de. Twee Kinner sünd bi den Unfall ümkamen, 102 Deelnehmers weern tovn Deel swoor besehrt. Gegen de Veranstalters geev dat en Gerichtsverfohren. Dorbi is faststellt worrn, dat de Sorgfaltsplicht nich beacht worrn is, vun wegen dat sik de Veanstalters nich kunnig maakt harrn, wo veel Togkraft dat veel to dünne Kunststoffseel uthollen künn. Bito harrn se sik ok keen Gedanken to’n Afbreken vun de Veranstalten in’n Nootfall maakt. Dat dorbi ok een to Dood kamen künn, harrn se aver nich vörrutsehn künnt. Dorüm sünd de Verantwoortlichen blots wegen lichtfardig Liefbesehren veroordeelt worrn un nich wegen lichtfardig Dootmaken.[1]

Al 1908 hett dat bi de Olympschen Spelen 1908 in London en traagschen Unfall geven, bi den twee US-Amerikaners doodbleven sünd.

Ok an’n 12. Mai 1984 hett dat bi den Versöök in’t Guinness-Book vun de Rekorden to kamen en döödlichen Unfall in’t Swiezer Lenzburg geven,[2] as dat Seel tweireten is.

Dat Tau hett bi den Sport engrote Belasten uttohollen. Wenn to’n Bispeel op beide Sieten elk teihn Personen mit 80 kg Liefgewicht teht un man de Kraft mit en Ruck-Fakter vun 2,5 multiplizeert, gifft dat en Togkraft vun ruchweg 20 kN. De Rietfastigkeit vun’t Tau mutt bi en tweefacken Sekerheitsfakter in dissen Fall bi 40 kN liggen.

Egent sünd Hemp- un Hemp-Kunststoff-Selen, de en lütte Dehnen opweist un ok in’n Fall vun’t Rieten nich elastisch na achtern slaht. En Seel ut Langhemp mit en Dörmeter vun 32 mm, dat na DIN prüft is, hett en Rietfastigkeit vun 70 kN. Wenn de Deelnehmers dat Tau nich eenfach loslaten doot, kann een ok dat Risiko to Störten siet hollen warrn.

Bi’t Utöven vun’n Sport besteiht keen Liefkuntakt twüschen de gegnerischen Mannschoppen, so dat de Sport in’n ordigen Bedrief bannig fair is un wenig Unfallgefohr bargt.

Olympiawinner[ännern | Bornkood ännern]

Johr/Oort Gold Sülver Bronze
1900 in Paris Däänmark/Sweden (mixed Team)
Edgar Aabye
August Nilsson
Eugen Schmidt
Gustaf Söderström
Karl Staaf
Charles Winckler
Frankriek
Raymond Basset
Jean Collas
Charles Gondouin
Joseph Roffo
Émile Sarrade
Constantin Henriquez de Zubiera
-
1904 in St. Louis USA
(Milwaukee Athletic Club)
Oscar Olson
Sidney Johnson
Henry Seiling
Conrad Magnusson
Patrick Flanagan
USA
(Southwest Turnvereen of Saint Louis I)
Max Braun
William Seiling
Orrin Upshaw
Charles Rose
August Rodenberg
USA/Düütschland (mixed Team)
(Southwest Turnvereen of Saint Louis II)
Charles Haberkorn
Frank Kugler
Charles Thias
Harry Jacobs
Oscar Friede
1906 in Athen[3] Düütschland
Wilhelm Born
Wilhelm Dörr
Karl Kaltenbach
Josef Krämer
Wilhelm Ritzenhoff
Heinrich Rondi
Heinrich Schneidereit
Julius Wagner
Grekenland
Konstantinos Lazaros
Spyros Lazaros
Georgios Papakhristou
Georgios Psakhos
Vasilios Psakhos
Panagiotis Trivoulidis
Antonios Tsitas
Spyros Vellas
Sweden
Erik Granfelt
Gustaf Grönberger
Anton Gustafsson
Oswald Holmberg
Eric Lemming
Axel Norling
Carl Svensson
Ture Wersäll
1908 in London Grootbritannien
(City of London Police)
William Hirons
Frederick Goodfellow
Edward Barrett
John James Shepherd
Frederick Humphreys
Edwin Mills
Albert Ireton
Frederick Merriman
Grootbritannien
(Liverpool Police)
Patrick Philbin
James Clarke
Thomas Butler
Alexander Kidd
George Smith
Thomas Swindlehurst
Daniel McLowry
William Greggan
Grootbritannien
(Metropolitan Police K Division)
Walter Tammas
William Slade
Alexander Munro
Ernest Ebbage
Thomas Homewood
Walter Chaffe
James Woodget
Joseph Dowler
1912 in Stockholm Sweden
Arvid Andersson
Adolf Bergman
Johan Edman
Erik Algot Fredriksson
Carl Jonsson
Erik Larsson
August Gustafsson
Herbert Lindström
Grootbritannien
Alexander Munro
John Sewell
John James Shepherd
Joseph Dowler
Edwin Mills
Frederick Humphreys
Mathias Hynes
Walter Chaffe
-
1920 in Antwarp Grootbritannien
George Canning
Frederick Holmes
Edwin Mills
John James Shepherd
Harry Stiff
John Sewell
Frederick Humphreys
Ernest Thorne
Nedderlannen
Willem van Rekum
Marinus van Rekum
Willem van Loon
Henk Janssen
Wilhelmus Bekkers
Johannes Hengeveld
Sijtse Jansma
Antonius van Loon
Belgien
Édouard Bourguignon
Alphonse Ducatillon
Rémy Maertens
Christian Piek
Henri Pintens
Charles Van den Broeck
François Van Hoorenbeek
Gustave Wuyts

Borns[ännern | Bornkood ännern]

  1. Oordeel in’n Fall Tautrecken
  2. Unfall in Lenzburg bi’t Tautrecken, SF-Video-Portal, afropen an’n 23. November 2009
  3. Twüschenolympiade

Weblenken[ännern | Bornkood ännern]

Commons-logo.svg Tautrecken. Mehr Biller, Videos oder Audiodateien to’t Thema gifft dat bi Wikimedia Commons.