Solveig Rogstad
Solveig Rogstad (* 31. Juli 1982) is en ehmalge norweegsch Biathletin.
Solveig Rogstad nehm tüschen 2001 un 2003 jedes Johr an de Junioren-Weltmeesterschapen in‘n Biathlon deel. Hör best Ergevnisse reck se dorbi glieks bi dat eerste Mal 2001 in Chanty-Mansijsk. Hier wurr se Veert in’n Sprint, Teihnt in de Verfolgung un mit de norweegsch Staffel keem se up den fieften Platz. Siet 2003 is se ok in den Europacup antreeden un hett sück dor so nah un nah verbetert. 2004 kunn Rogstad in Östersund eerstmals in‘n Biathlon-Weltcup antreeden wurr 72. In‘n Sprint. In Kontiolahti kunn se to Anfang van de Saison 2007/08 in en Sprintrennen as 20. eerstmals Weltcuppunkte halen. In dat ansluutend Verfolgungsrennen leep se as Söbente eerstmals ünner de best Teihn. Hör gröttste Spood weer en Sieg in de Verfolgung van Ruhpolding 2008, wo se vör Kati Wilhelm, Kaisa Mäkäräinen, Tora Berger un annern wunn. Söss van hör negen Top-Ten-Ergevnisse reck se in disse Saison un wur 14. van de Gesamtwertung. Se nehm denn ok an de Biathlon-Weltmeesterschapen 2008 in Östersund deel un keem dorbi up Platz 10 in’t Eenzel, Platz 15 in’n Sprint un Platz 24 in de Verfolgung. In’n Massenstart reck se Platz 16 un mit de Staffel keem se up Platz 6.
De Folgesaison leep nich mehr so goot. Hör best Eenzelergevnis weer de 5. Platz bi dat Eenzelrennen van Hochfilzen. In de Weltcupgesamtwertung keem se an’t Enn‘ up den 29. Platz. Ok bi de Biathlon-Weltmeesterschapen 2009 in Pyeongchang weer se nich besünners spoodriek. In’t Eenzel keem se blots up Platz 43. Platz 24 und 23 in Sprint un Verfolgung un Platz 11 in dat Staffelrennen weern dor dat Ergevnis.
In de Saison 2009/10 keem se in den Weltcup meest nich mehr to’n Insatz un blots eenmal in de Punkteränge (Platz 33 bi de Verfolgung van Hochfilzen). Solveig Rogstad nehm an de Olympisch Winterspielen 2010 deel. Hör best Resultat weer de 61. Platz in‘t Eenzel. Mit de Staffel keem se up den 4. Platz.
In de Saison 2010/11 keem se blots noch eenmal in den Weltcup to’n Insatz, keem dor in‘ Sprint in Antholz aber blots up Platz 63 un bleev ahn Punkte. In‘n November 2011 hett se hör Rückträe van den Leistungssport verklort. Se wull en Medizinstudium anfangen.