Sassanidenriek

Vun Wikipedia
Wesseln na: Navigatschoon, Söök

Dat Sassanidenriek (پادشاهی ساسانیان) is dat tweete grote Perserriek ween. Dat hett so um un bi in de Kuntreien vun de hüdigen Länner Iran un Irak un dor umto legen. Geven hett dat düt Riek vun dat Enne vun dat Partherriek af an bit to'n Unnergang gegen de Arabers, also vun 224 bit to de Slacht vun Nehawend 642 oder ok bit to'n Dood vun den Grootkönig Yazdegerd III. in dat Johr 651.

Dat Sassanidenriek warrt vun de Forschung towielen ok Neepersisch Riek nömmt. Över Johrhunnerte hen weer dat en wichtige Grootmacht un en Gegenspeler vun dat röömsche oder ok dat Byzantiensche Riek. Man twuschen düsse Länner hett dat nich bloß Krieg geven, sunnern de hefft gegensiedig ok allerhand Infloot up'nanner nahmen.

De Naam vun dat Riek kümmt vun dat leste vörislaamsche Königshuus vun de Sassaniden (beter: Sasaniden) vun her. Düt Huus hett en Stammvadder mit Naam Sasan as sien Vörvadder ankeken, man düsse Sasan is in de Historie nich recht to griepen. Later is upschreven wurrn, he scholl üm 200 n. Chr. rüm Böversten Preester in den Tempel vun Anahita in Istakhr ween hebben. Bloß en ganz ringe Tahl vun Königen vun dat Sassanidenriek (de eerste weer Bahram Chobin 590) kemen nich ut düt Huus vun de Sassaniden. In de moderne histoorsche Literatur warrt de Naam Sassaniden nich bloß för dat Königshuus, man för all Inwahners vun ehr Riek bruukt.