Partherriek

Vun Wikipedia
Wesseln na: Navigatschoon, Söök

De Parthers (ooldpersisch Parθava, lat. Parthi) sünd en iraansch Volk ween. Vun dat 3. Johrhunnert v. Chr. af an hefft se en Riek in den hüdigen Iran tostann brocht. Tolest hören dor ok grote Deele vun Mesopotamien, vun dat süüdwestliche Middelasien un allerhand Kuntreien dor umto mit to dat Riek to. Mitunner weert se, na den Naam vun dat Herrscherhuus, ok Arsakiden nömmt.

Geschicht vun dat Partherriek[ännern | Bornkood ännern]

Wie dat losgung[ännern | Bornkood ännern]

De Parthers sünd an un for sik en Unnerstamm vun dat Volk vun de Skythen ween. Ehr Naam is dormols Parners (Parni) ween. Se hefft an de süüdööstliche Kant vun de Kaspische See seten. As se vun dor ut in de Satrapie Parthien inwannert sünd, hefft se vun dor den Naam Parthers annahmen. Twuschen 250 v. Chr. un 238 v. Chr. hefft de Parthers unner ehrn Baas Arsakes en Deel vun de iraanschen Gemarken vun dat Seleukidenriek innahmen. So hefft se, tominnst indirekt, an de Geschicht vun dat Achämenidenriek anknütten konnt. Man alltohopen is ut düsse Tied un ok ut de eersten Johre vun dat Riek nich veel up us to kamen.

De Länner, de nu vun de Parthers innahmen wurrn sünd, weern nich sunnerlich dull unner den Indruck vun den Hellenismus kamen. Man dat geev doch Gemarken, wo de Greken wat to Seggen harrn, sunnerlich ind e Städer. De Parthers hefft sik vun de Greken slank dat Slahn vun Münten afkeken un de Greeksche Spraak is woll for en ganze Tied een vun de Spraken for de Verwaltung ween. Alltohopen hefft sik in dat nee Riek allerhand Traditschonen vun dat Achämenidenriek un vun de Seleukiden verbunnen. To'n lesten Mol slump de Versöök vun de Seleukiden, de Länner torüch to winnen, de se al verlaren harrn, in de so nömmte Anabasis unner König Antiochos III. (209 - 206 v. Chr.). Dormols mössen de Parthers en Tied lang wedder de Seleukiden ehr Upper-Regeern tolaten, man denn wenn sik Antiochos na Westen to. As he dor vun de Römers en up'e Mütz kregen harr, weern de Parthers wedder vörweg un breden sik ut. In'n Osten stunnen se gegen Graeco-baktrische Königriek, man dat löös sik slank up, ok vunwegen Steppenvölker ut Middelasien, de in ehr Land infullen weern un de in de doren Länner jummers en grote Gefohr ween sünd. Ok de Parthers hefft dor later veel mit to doon harrt, düsse Völker torüch to slahn.