Sally Kristen Ride

Vun Wikipedia
Wesseln na: Navigatschoon, Söök
Sally Kristen Ride

Sally Kristen Ride (* 26. Mai 1951 in Los Angeles, Kalifornien; † 23. Juli 2012 in La Jolla[1] weer en US-amerikaansch Astrophysikerin un Astronautin. Se weer de eerste Amerikanerin in’ Weltruum un nah de Kosmonautinnen Walentina Tereschkowa un Swetlana Sawizkaja de darte Fru, de en Ruumfloog maakt hett.

Leven[ännern | Bornkood ännern]

Ride wurr as Dochter vun en Politikwetenschap-Perfesser un en Beraderin vun en Fruengefängnis in Encino bi Los Angeles, Kalifornien boren, wo se ok hör Kindheit verbrocht hett. Se hett bit 1968 de Westlake School for Girls (hüüd: Harvard-Westlake School) besöcht. In disse Tiet weer se en spoodriek Tennisspelerin, de vun Billie Jean King fördert wurr. Dornah hett se eerst an dat private Swarthmore College in Pennsylvania studeert, is denn aber an de Stanford University in Palo Alto wesselt, wo se 1973 twee Bachelor-Diplome in Engelsch un in Physik kreeg. Dornah hett se sück up astrophysikalisch Fraagstellungen un Laser-Anwendungen spezialiseert. 1975 kreeg se in Physik en Master un dree Johr later hett se hör Doktertitel in Physik maakt.

NASA-Tätigkeit[ännern | Bornkood ännern]

Ride hett sück 1977 as Astronauten-Anwärterin bi de NASA bewurben un wurr in’ Januar 1978 in de achte Astronautengrupp upnommen. Dat weer dormals de eerst nee uttobillen Astronauten siet August 1969 un de eersten, de för dat nee Space-Shuttle-Programm nommen wurrn. Eerstmals wurrn dorbi ok Fruen utwählt. Neben Ride geev dat noch fiev anner Fruen, de Astronaut wurrn sünd.

Nahdem se mit hör allgemeen Astronautenutbillen as Missionsspezialistin fardig weer, hett Ride in’t Kontrollzentrum in Houston, Texas as Capcom arbeit, wo se de Shuttle-Missionen STS-2 in’ November 1981 un STS-3 in’ März 1982 betrüen dee.

Hör eerst eegen Ruumfloog hett se in’ Juni 1983 als Liddmaat vun de Mission STS-7 an Bord vun de Ruumfähre Challenger maakt un wurr dormit de eerste Amerikanerin, de de Eerdümloopbahn recken dee. Bi hör Start weer se 32 Johr un 23 Daag old un stell dormit den bit hüüd gültigen Rekord as jüngst US-Ruumfohrer up. De Mission gung van 18. bit 24. Juni. De anner Crew-Liddmaaten weern Robert Laurel Crippen (Kommandant), Frederick Hamilton Hauck (Pilot) un de anner beid Missionsspezialisten Normal Earl Thagard un John McCreary Fabian.

In’ Oktober 1984 hett se hör tweeten Ruumfloog in’ Rahmen vun de Mission STS-41-G, ebenfalls an Bord vun de Challenger maakt. Up disse Mission, de van 5. bit to’n 13. Oktober düern dee, sünd eerstmals söben Ruumfohrer in een Ruumschipp flagen. Kommandant weer ditmal weer Robert Laurel Crippen un de Pilot Jon Andrew McBride. Missionsspezialisten weern, neben Ride noch Kathryn Dwyer Sullivan un David Cornell Leestma. Dorto keemen noch de Bruuklastspezialisten Marc Garneau ut Kanada un Paul Desmond Scully-Power.

Sally Ride weer mehr as 343 Stünn in’t All bi hör twee Insatzen. 1985 wurr se för en darten Ruumfloog as Liddmaat vun de Mission STS-61-M inplaant. De Mission wurr aber nah de Challenger-Katastroph in’ Januar 1986 ersatzlos streeken.

Nah de Challenger-Katastrophe weer Ride tosommen mit Neil Armstrong Liddmaat in de vun William P. Rogers leit Ünnersökenskommission vun dat Unglück. Ansluutend is se in dat NASA-Hööftquartier nah Washington D.C. wesselt un övernehm de Leitung vun en Arbeitsgrupp, de sück mit de langfristig Planung vun tokünftig Projekten vun de NASA (to’n Bispeel Mars Pathfinder) befaaten dee.

Nah dat Utscheeden bi de NASA[ännern | Bornkood ännern]

1987 hett Sally Ride de NASA verlaaten, um an dat Zentrum för Internatschonale Sekerheit un Wappenkontroll vun de Stanford University in Palo Alto to arbeiten.

Dornah nehm Ride hör Forschenstätigkeit in den Beriek Astrophysik weer up un kreeg later en Professur för Physik an de University of California in San Diego. Tietwies weer se ok siet Juni 1989 Leiterin vun dat California Space Institute an de Scripps Institution of Oceanography in La Jolla. Ride hett sück mit de Hochenergiephysik befaat un hett an Theorien to Plasma un interstellare Materie arbeit. 2001 hett se hör eegen Ünnernehmen Sally Ride Science grünnd, dat Lehrmaterialen för Kinner över dat Weltall anbütt.[2]

Nah den Afstört vun de Ruumfähre Columbia wurr Ride 2003 in de Ünnersökenskommission vun dat Unglück beropen. Se weer dormit de eenzig Person, de beid Unfallkommissionen anhörrn dee.

Sally Ride hett mehrere Böker to Weltruumthemen verfaat, dorünner dat Kinnerbook To Space and Back. Se hett sück besünners för de Förderung vun den wetenschaplichen Nahwassen bi Deerns insett. In de USA weer se, wiel bannig bekannt, faken Gastrednerin bi Veranstaltungen un is af un to in Fernsehshows (to’n Bispeel Sesamstraße) un Werbespots uptreden. För hör Book The Third Planet: Exploring the Earth from Space kreeg se 1995 tosommen mit hör Früendin un Geschäftspartnerin Tam O’Shaughnessy den Science Writing Award vun dat American Institute of Physics.

Privates[ännern | Bornkood ännern]

Ride weer tüschen 1982 un 1987 mit den Astronauten Steven Hawley verheiraadt. Kinner harrn se nich. All van 1985 bit to hör Dood harr se en Beziehung mit Dr. Tam E. O'Shaughnessy, mit de se all as Kind good Früend ween weer. [3] Ride is an’ 23. Juli 2012 an Buukseverdrüsenkrebs storven.[4]

Rekorde un Eerstleistungen[ännern | Bornkood ännern]

  • Eerste US-Amerikanerin in’ Weltruum (STS-7)
  • Eerste US-Amerikanerin, de tweemal in’t All weer (STS-41-G)
  • Jüngste US-Ruumfohrer (Öller bi’n Start : 32 Johr un 23 Daag)

Ehrungen[ännern | Bornkood ännern]

2013 wurr the postum mit de Medal of Freedom dör den US-amerikaansch Präsidenten Barack Obama uttekent. De Utteken wurr vun hör Levenspartnerin Tam E. O'Shaughnessy annommen.

Weblenken[ännern | Bornkood ännern]

Commons-logo.svg Sally Ride. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen[ännern | Bornkood ännern]

  1. [1] spiegel online 24. Juli 2012)
  2. [2] spiegel online 24. Juli 2012)
  3. http://www.buzzfeed.com/chrisgeidner/first-female-us-astronaut-sally-ride-comes-out
  4. Sally Ride, first American woman to fly in space, dies of cancer at age 61, http://www.news-press.com/article/20120723/NEWS01/120723018/1075/Sally-Ride-first-American-woman-fly-space-dies-cancer-age-61?odyssey=nav%7Chead, van 23. Juli 2012