Resenmuulhai

Vun Wikipedia
Wesseln na: Navigatschoon, Söök
Resenmuulhai
Resenmuulhai
Systematik
Ünnerklass: Plattenkemer (Elasmobranchii)
Böverornen: Haien (Selachii)
Ornen: Lamniformes
Familie: Resenmuulhaien (Megachasmidae)
Geslecht: Megachasma
Wetenschoplich Naam
Megachasma pelagios
Taylor, Compagno un Struhsaker 1983

De Resenmuulhai (Megachasma pelagios) is ene vun de dree bekannten Oorden vun Haien, de Plankton un annere lütte Deerter freet. He is in’t Johr 1976 opdeckt worrn un de eenzige Oort in de Familie vun de Resenmuulhaien.

Över de Biologie un den Levensruum is wenig bekannt, denn de Oort is eerst in’n November 1976 dat eerste Maal funnen worrn un weniger as 25 vun de Veecher sünd bet hüüt sehn worrn un noch weniger wetenschoplich ünnersöökt.

Dat längste Deert weer en Seken vun 563 Zentimeter, dat an’n 19. April 2004 bi Ikhihara in de Bucht vun Tokio dood an Land spöölt is, dat lüttste en Heken vun 177 Zentimeter, dat an’n 13. März 2004 in Sumatra fangen worrn is.

Bet hüüt is he in’n Atlantik, in’n Pazifik un in’n Oosten vun’n Indik funnen worrn, de mehrsten vör Kalifornien un rund üm Japan. Wohrschienlich leevt de Hai in de warmen Rebeden in all de groten Ozeanen.

Utsehn[ännern | Bornkood ännern]

De Hai hett sienen Naam vun den temlich groten, runnen Kopp mit de korte Schnuut un dat grote Muul. De Klöör vun’n Rügg is swattbruun, de Buuk is wat blieker. Baven vun’t Muul hett de Hai en witten Striepen. Se hebbt twee Rüggflossen, ene asymmetrische Steertfloss, twee grote Bostflossen un twee Poor Buukflossen, bi de dat twete Poor düüdlich lütter is.

Verholen[ännern | Bornkood ännern]

Vun dat, wat in’n Maag vun dode Resenmuulhaien funnen worrn is, weet wi, dat se Krill freet. Wat he noch annere Saken freten doot, weet wi nich seker. Anners as de Waalhai kann he dat Water nich blot passiv, sünnern ok aktiv insugen.

An’n 21. Oktober 1990 kunn vör Dana Point in Kalifornien en binah fief Meter lang Heken fangen un markt warrn, so dat de Forschers wat rutkregen hebbt över dat däägliche Wannern vun’n Hai, de in de Nacht in en Deep vun rund 15 Meter leevt un den Dag över in deper Water duukt.

Opdecken[ännern | Bornkood ännern]

De eerste Resenmuulhai is an’n 15. November 1976 vör Oahu, Hawaii, fangen worrn. De Kru vun en US-amerikaansch Forschensschipp harr en 446 Zentimeter lang Heken an Boord haalt. Dat Veech warrt hüüt in’t Bernice P. Bishop Museum in Honolulu opbewohrt.

Kiek ok bi[ännern | Bornkood ännern]