Klitorisvörhuut

Vun Wikipedia
Wesseln na: Navigatschoon, Söök
Klitoris mit Vörhuut

De Klitorisvörhuut (lat. Praeputium clitoridis) is en Sliemhuutfalt, de bi Fronslüüd de Ekel (Glans clitoridis) vun de Klitoris ümgeven deit. De Vörhuut stellt en ventral Utwieten vun de Lütten Schaamlippen dor un kann anatomisch as Deel vun jem ansehn warrn. De Klitorisvörhuut is dat lieke bi de Fro as dat de Vörhuut vun Pint bi’n Mann is. Ok de Funkschoon is gliek, neemlich de Ekel, de dorünner liggt, to schulen.

Gestalt[ännern | Bornkood ännern]

Bi Fronslüüd kann de Klitorisvörhuut ganz verscheden utprägt wesen in’n Sinn vun Form un Grött – anners as bi de Mannslüüd. Wiel de Ekel bi Fronslüüd mit stark utprägte Klitorisvörhuut vullstännig verdeckt is un ok dör Torüchschuven nich freeleggt warrn kann, liggt de bi annere deelwies oder ok völlig free. Se kann in’n Normaltostand vullstännig vun de Groten Schaamlippen verdeckt wesen, oder ok dortwüschen rutkieken.

Bi de meisten Söögdeerten is de Klitorisvörhuut mit de Ekel verwassen, man bi Peerd un Hunnen ümgifft de Vörhuut en lütte Kuhl (fossa clitoridis), woneem de Ekel binnen freeliggt.

Modifikatschonen[ännern | Bornkood ännern]

Piercing dör de Klitorisvörhuut

Dat Klitorisvörhuutpiercing is de verbreedste Form vun Intimpiercings bi Fronslüüd. Faken is ok dat meent, wenn vun en Klitorispiercing snackt warrt, wat dat ok gifft, man veel rorer.

Liek de Besnieden bi Mannslüüd (Zirkumzision) kann ok bi en Fro en Besnieden, also dat Wegmaken vun de Klitorisvörhuut, vörnahmen warrn. Normalerwies gifft dat dorför aver keen medizinschen Grund, höchstens wenn de Vörhuut to drang is. Fakener warrt de Ingreep aver, jüst so as bi de Schaamlippenverlüttern, rein ut kosmetisch Grünnen maakt[1].

Dat is ümstreden, wat de Operatschoon en Effekt op dat Lustgeföhl hebben kann. Wieldat en poor Studien positive Effekten bi Fronslüüd mit Orgasmusstören funnen hebbt[2], sünd bi annere Studien keen Ünnerscheeden nawiesbor wesen.[3]

Borns[ännern | Bornkood ännern]

  1. McLintock DG (1985): Phimosis of the prepuce of the clitoris: indication for female circumcision. Journal of the Royal Society of Medicine 78(3): 257–258.
  2. Artikel: Scientific American (engl.)
  3. Artikel: Journal of sex and marital therapy (engl.)