Karl Nobel

Karl Nobel (* 30. März 1904 in Eindörp; † 22. Februar 1982 in Buxthu) weer en nedderssassischen Politiker von de SPD.

Nobel is 1904 in Eindörp boren. He weer op de Volksschool un hett denn en Lehr in en Maschinenfabrik maakt. Na siene Lehrtied hett he in verscheden Bedrieven as Maschinenslosser arbeidt un weer later Rohrleitungsmontör op verschedene Eerdöölfeller. Noch later weer he Huusmeester an de Beroopsschool Buxthu.

Von 1929 bet 1933 weer Nobel Maat von’n Stadtraad von Buxthu. Na dat Enn von’n Tweten Weltkrieg weer he Maat in’n Kreisdag von’n Landkreis Stood un in’n Kreisutschuss. Ok in’n Stadtraad von Buxthu weer he wedder. Von’n 6. Mai 1959 bet 5. Juni 1967 (veerte un föffte Wahlperiood) weer Nobel för den Wahlkreis Buxthu Maat von’n Landdag von Neddersassen.