Kamasutra

Vun Wikipedia
Wesseln na: Navigatschoon, Söök
Sex-Bild ut en ole Kamasutra-Handschrift ut Indien

Dat Kamasutra (Sanskrit: कामसूत्र, „Versen vun dat Verlangen“) ,woll schreven in de Tiet twuschen 200 un 300 n. Chr. vun Mallanaga Vatsyayana, is een Book öber Erotik un Leev. Veel Lüde hefft düt Book as een besunners wichtigen Text vun de Weltkulturgeschicht ansehn. Dat warrt tomeist as en eenfach Lehrbook öber Erotik ankeken, man dat is veel mehr. De vulle Naam vun dat Book is „Vatsayana Kamasutra“. Dat is in Sanskrit schreven.

Wat dor insteiht[ännern | Bornkood ännern]

To’n eersten Mol is dat Book 1884 vun Richard Francis Burton ut dat Sanskrit in de Engelsche Spraak öbersett wurrn. In de westliche Welt hefft se dat aber verkehrt verstahn as en glibberig Handbook dör öber, wie een sik bi den Bisloop anstellen kann.

In den Ruum vun de indische Kultuur ist dat akraat fastschreven, wie de Minschen soziol to’nanner staht. Dat kümmt dor up an, wat een in de egen Kast doon draff un wat een doon mutt. Wenn een sik dör över henwegsetten will, denn warrt he dor för straaft. In all soziole Schichten un Kasten warrt dat as richtig ansehn, dat Mann un Fro mit’nanner wat hebben dröövt un dat de Mann dor denn dat Seggen bi hett (patriarchal un heterosexuell Spoor). Man in de Städer, wo dat Kamasutra upschreven wurrn is, weer düsse ole Schick dör’anner kamen. In düsse Laag nümmt dat Book nu den Leser an’e Hand un wiest em, wie he de Kunst vun dat Leven an’n Besten utöven kann. Dor geiht dat bi üm den Sex, man ok üm Ethik un um dat, wat sik höört. Dor gifft dat nipp un nau Henwies bi, wie dat bi’n Bisloop togahn mutt un ganz verscheden Aarten vun Sex weert vörstellt. Wenn vun’n homosexuellen Sex snackt warrt, denn is de aber ünner den heterosexuellen Sex ünner oordent. (Bi dat Öbersetten in de Engelsche Spraak sünd düsse Stäen glieks weglaten wurrn). Fudderhen warrt ok schreven över de Wahl vun en Partner, wie een in de Eh’ dat Seggen behöllt, över’n Ehbrook, över Prostitutschoon un över dat Innehmen vun Drogen. In dat Book warrt dor ok up henwiest, dat dat Spaaß maken kann, wenn en sik bi de Leev sleiht. Man dat schall een, meent dat Book, just as Bieten un Kniepen, bloß maken, wenn dor de Beiden Spaaß an hefft. Wegen düsse Henwies warrt dat Kamasutra ok as dat eerste Book ankeken, wo över SM wat insteiht.

De Afsicht vun dat Kamasutra[ännern | Bornkood ännern]

Dat Kamasutra is an en königlichen Hoff schreven wurrn. Dormols weer de Religion in Indien ganz wichtig un de enkelte Minsch hett nix gollen. Dat Kamasutra muckt dor nu so’n beten gegen an, dat jeden Minschen vun ole Schriften un Gesetzen her vörschreven is, wat he to doon hett un dat he gor nich free is, sik dat süms to överleggen. Dor maakt sik dat ok so’n beten lustig üm över de olen Regeln vun’n Anstand un vertellt, wie een de gröttsten Swienereen maken kann, ohn dat de Annern dor över snackt.

Kama bedutt so veel as Jieper oder Drift. Dat weer dormols en ganz unanstännig Woort. Düsse Drift hett nich unbedingt wat mit Leev un mit Sex to kriegen, ok wenn de Maag gnurrt, deit he dat wegen dat Kama. So en unanstännig Woort för den Naam vun en Lehrbook to nehmen, dat weer bi de trüchhöllern Inders to veel. Dat Woort Sutra keem just vun de olen ehrwürdigen hilligen Böker her, wo de Sutren in upschreven sünd. As de Schriever dat unanstännige Woort Kama un dat ehrwürdige Woort Sutra tohopenmengeleert hett, hett he de Inders to’n Deel gegen sik upbröcht. He hett dor sien Book ja mit so henstellt, as wenn dat just so en oolt un ehrwürdig Book weer, as de annern.

In dat Kamasutra steiht wiß ganz gründlich un nipp un nau dorvun schreven, wie en passlich Sex-Objekt funnen weern kann. Un dor steiht ok nippe in, wie een dat rümkriggt un bruken kann un achterher wegsmieten. Man dor geiht dat nich üm sexuell Opklaren bi, as wi dat ut dat 20. Johrhunnert bi Alfred Charles Kinsey finnt.

Vunwegen dat een Sanskrit-Versen ok in düütsche Spraak nich goot verkopen kann,sund mit de Tiet vun de Verlegers jummers mehr erotisch Biller dor inboot wurrn. Tolest weer dat denn so wiet un düsse Biller hefft den gröttsten Deel vun de Saak utmaakt. To lesen geev dat bloß noch wat bi de Ünnerschriften vun de Biller. De Schriever vun dat Book hett mit düsse Aart vun Sex sells nix an’n Hoot harrt. He wull, dat de falschen Preesters mit jem ehr Sanskrit-Sabbelee un de Hofflüde jem ehr Boxen rünner laten mössen.

Dree gode Saken[ännern | Bornkood ännern]

Ok bi dat Kamasutra liggt de ole indische Gloven togrunn. Dor gellt dat, in dat Leven dree gode Saken to kriegen: Dat eerst is Dharma. Dat is, wenn di dat in’n Geist goot geiht, vunwegen dat du di an de Geboden vun de Religion höllst. Dat tweede is Artha. Wenn du Klei unner de Fööt hest un en rieken Mann büst. Tolest kümmt denn noch Kama. Dat is, wat dat Lief Spaaß maken deit. Dat wichtigst is dat Böverst. Wat dor ünner kummt, draff vun de högern Saken nix wegnehmen.

Böker[ännern | Bornkood ännern]

Weblinks[ännern | Bornkood ännern]

Commons-logo.svg Kamasutra. Mehr Biller, Videos oder Audiodateien to’t Thema gifft dat bi Wikimedia Commons.
Wikiquote-logo.svg Op Wikiquote gifft dat Zitaten to, över oder vun „Mallanaga Vatsyayana“ (hoochdüütsch).