Judas Makkabäus

Vun Wikipedia
Judäa in Judas Makkabäus siene Tied

Judas Makkabäus oder Judas de Makkabäer († 160 v. Chr.; Hebrääsch:יהודה המכבי Jehuda haMakabi; ok: Juda; ok: Makabäus) is en wichtigen Anföhrer in de Joden ehren Upstand gegen de Seleukiden ween. He höör to dat Huus vun de Hasmonäers to. De Makkabäers ehr Upstand weer 167 v. Chr. dör Judas sien Vadder Mattatias in Gang kamen. Nadem Mattatias 165 v. Chr. doot bleven weer, is Judas Baas vun den Upstand wurrn. Unner em is dor en wohren Guerilla-Krieg vun wurrn. Sien wichtigsten Sieg unner Wapen weer dat, as he 164 v. Chr. den Tempel in Jerusalem erovern dö. He hett em foorts rein maken laten na dat jöödsche Gesett. Bit up den hüdigen Dag fiert de Joden düssen Sieg mit ehr Chanukka-Fest. Unner Judas Makkabäus sien Leit sund allerhand Gemarken to dat jöödsche Land hento kamen. Amenne hett he dat Enn vun de Makkabäers ehren Upstand nich mehr mitkregen. 160 v. Chr. is he fullen in en Feldslacht mit de Truppen vun de Seleukiden.

Na Judas sien Dood is sien Broder Jonathan Makkabäus Baas vun den Upstand wurrn.