Hasmonäers
Hasmonäers is de Naam vun en Huus vun jöödsche Könige. De Familiennaam geiht wohrschienlich torüch up en Vorweser mit Naam Chasjmon/Hasmon.[1]
Na den Upstand vun de Makkabäers in dat Johr 165 v. Chr. hefft se en sülvstännigen Staat in Palästina grünnt. De häsmonääschen Köige sund Herrschers un togliek Hoge Preesters ween. Se hefft en Preester-Königdom up'e Been stellt, wat stracks na de Religion tohopen stellt weer.
In dat Johr 63 v. Chr. hett Pompeius dat Riek erovert. Dor hett dat siene Unafhängigkeit verloren un blot noch wieter leevt as en Staat, de vun Rom afhängig weer. Vunwegen datt Pompeius Palästina siene Struktur 63 v. Chr. ganz ummuddelt hett, is for de Hasmonäers blot noch dat Amt vun de Hogen Preesters nableven. In dat Johr 37 v. Chr. hett dat Huus vun de Hasmonäers endgüllig siene Macht verloren un Herodes de Grote is König wurrn. In dat Johr 6 n. Chr. is dat Königriek vun Kaiser Augustus uplööst ún in de röömsche Provinz Judäa ummuddelt wurrn. Dor weer dat mit den Staat den ganz toenne.
De hasmonääschen Herrschers:
- Judas Makkabäus (165–160 v. Chr.)
- Jonathan (160–143 v. Chr.)
- Simon (143–135 v. Chr.)
- Johannes Hyrkanos I. (135–104 v. Chr.)
- Aristobulos I. (104–103 v. Chr.)
- Alexander Jannäus (103–76 v. Chr.)
- Salome Alexandra (76–67 v. Chr.)
- Aristobulos II. (67–63 v. Chr.)
Hogepreesters vun 63 v. Chr. af an:
- Johannes Hyrkanos II. (63–40 v. Chr.)
- Antigonos (40–37 v. Chr.)
- Aristobulos III. (35 v. Chr.)
Annere Liddmaten vun de Familie:
- Alexander, Sohn vun Aristobulos II., († 49 v. Chr.)
- Alexandra, Fro vun Alexandros, Mudder vun Mariamne, († 28 v. Chr.)
- Mariamne, Herodes den Groten siene Fro, († 29 v. Chr.)
Belege[ännern | Bornkood ännern]
- ↑ De Familiennaam vun dat Huus kummt na Josephus vun en Vorvadder mit Naam Ἀσαμωναῖος (Asamônaios oder Asmoneüs) (Kiek bi Flavius Josephus, Joodse Oudheden XII 265). Vun em warrt seggt, he weer de Overgrootvadder vun Mattathias, man fudder is over em nix bekannt.
Literatur[ännern | Bornkood ännern]
- Markus Sasse: Geschichte Israels in der Zeit des Zweiten Tempels. Neukirchener Vlg., Neukirchen-Vluyn 2004, ISBN 3-7887-1999-0. 2. Upl. 2009.
- Emil Schürer: Geschichte des jüdischen Volkes im Zeitalter Jesu Christi. Bd I. Leipzig 1901.
Weblenken[ännern | Bornkood ännern]
- Doris Lambers-Petry: Hasmonäer in: Michaela Bauks / Klaus Koenen (Hgg.): Das wissenschaftliche Bibellexikon im Internet (WiBiLex) 2007ff.