John Tyler

Vun Wikipedia
John Tyler

John Tyler (* 29. März 1790 in Charles City County, Virginia; † 18. Januar 1862 in Richmond) weer de 10. Präsident vun de USA van 6. April 1841 bit 4. März 1845.

He stamm ut en riek Planterfamilie un weer Afkaat. Oorsprünglich weer he Viezpräsident ünner William Henry Harrison, aber nahdem de överraschend storben weer, wurr he sülvst Präsident. He weer dormit de eerste Viezpräsident, de nah de Dood vun en Präsident sülvst in dit Amt keem. To sien Amtstiet weer dat aber noch nich ganz kloor, of he nu blots Acting President (so’n Oort Stattholler) oder en „richtig“ Präsident weer. He hett mit Entschiedenheet de Positschoon vertreden, dat he tatsächlich Präsident weer. All Breef, de an de „Acting President“ schickt wurrn, hett he nich apen maakt.

As Süüdstaaten-Aristokrat weer de ehmalge Gouverneur un Senator vun Virginia blots upstellt wurrn, um Wählers ut süüdlich Rebeden för Harrison to winnen, mit de Slogan Tippecanoe and Tyler, too. Sien politisch Ansichten weern aber genau gegen de Whig-Partei, för de he ja upstellt weer. De Whigs vertreden de Interessen vun de Noordstaaten mit de ehr upstrebend Industrie un Geschäftswelt- Tyler legg aber sien Veto tegen de Grünnen vun en Natschonalbank in, en Grundanleggen vun de Whigs un deren prominentst Senator Henry Clay. In’ Harvst 1841 hebbt se hüm denn ut de Whig-Partei rutsmeeten, worup he sück denn immer mehr mit de Demokraten tosommen dee. 1844 hett he denn sogor den prominenten Süüdstaten-Demokraten John C. Calhoun to’n Secretary of State maakt hett.

Dormit weer dat Tweeparteiensystem bit to’n Amerikaanschen Börgerkrieg unuplöslich mit de Noord-Süüd-Konflikt verbunnen: de Whigs weern de Noordstaaten- un de Demokraten de Süüdstaatenpartei.

1842 kunn sien Staatssekretär Daniel Webster en Grenzverdrag mit dat Königriek Grootbritannien un Irland afsluten, bi de de Grenz tüschen Maine un Kanada fastleggt wurr.

In’ Vörfeld vun de Börgerkrieg weer Tyler för de Sezession un wurr ok in de Kongress vun de Konföderatschoon wählt, is aber an en Slaganfall storben, bevör he dat Amt antreden kunn.

Wiels he de Präzedenzfall is, dat de Viezpräsident in’t Präsidentenamt nahrückt, hett för de Verfatenshistorie vun de USA en temelk Bedüden, aber ansonsten hett Tyler nich völ reten; Theodore Roosevelt hett hüm sogor a politician of monumental littleness nömmt, wat sovöl heet as „Politiker vun en gewaltigen Lütt“.

Weblenken[ännern | Bornkood ännern]

Op Wikiquote gifft dat Zitaten to, över oder vun „John Tyler“ (hoochdüütsch).
John Tyler. Mehr Biller, Videos oder Audiodateien to’t Thema gifft dat bi Wikimedia Commons.