John Deere

Vun Wikipedia
Wesseln na: Navigatschoon, Söök
John Deere 6620

John Deere (egentlich Deere & Company) is en Ünnernehmen ut de USA, dat Fohrtüüch un Maschinen för de Landweertschop boot. Ehrn Sitt hett de Firma in Moline. Ok Maschinen för de Forstweertschop, för den Bo un för de Rasenpleeg warrt herstellt.

Historie[ännern | Bornkood ännern]

1837 hett de Groffsmitt John Deere sik in Grand Detour in Illinois dallaten. He hett dor Plöög boot, de ut Stahl weren un mit en nee Verfohren dör Poleren beter weren op den sworen Boden in de Prärie as de olen Plöög ut Iesen oder Holt. Dat weer de Grundlaag för sien Ünnernehmen Deere & Company, dat al vun Anfang an ünner den Markennaam John Deere bekannt weer. 1848 is he mit dat Ünnernehmen vun Grand Detour na Moline ümtagen, wat an’n Mississippi un an de Iesenbahn leeg, dat de Produkte beter transporteert warrn köönt. Duur nich lang, dat Deere mehr as 1.000 Plöög in’n Johr boot hett. 1852 hett Deere siene Partners utbetahlt un de Firma alleen övernahmen. 1859 hett sien Söhn Charles Deere denn dat Leid övernahmen. De Firma harr verschedene Naams in disse Tiet, John Deere, John Deere & Company, Deere & Company, Moline Plow Manufactory un John Deere Plow Factory. 1868 hebbt se denn Deere & Company as Naam annahmen un ene Aktiengesellschop (amerikaansche Public Company) dor vun maakt.

Eerst mit dat Övernehmen vun de Waterloo Gasoline Engine Company kort na’n Eersten Weltkrieg hett John Deere de eersten Treckers boot. Toeerst sünd de noch ünner’n olen Naam lopen, aver 1923 hett John Deere anfungen, de Treckers mit dat John Deere D-Modell as John Deeres to verköpen. 1931 sünd de eersten Treckers mit Gummiräder rutkamen, de de Stahlräder aflööst hebbt, de dat noch bet 1939/40 geven dee. 1956 hett John Deere Lanz övernahmen.

In de Johren 1980 harr John Deere ok Problemen mit de Rezession in de Landweertschop, hett dat aver henkregen, anners as vele annere in de Bransche, dat dat Ünnernehmen sülvstännig bleven is.

1999 hett John Deere mit Timberjack den gröttsten Anbeder vun Maschinen för de Forstweertschop övernahmen.

2005 harr John Deere alltohoop bi 47.400 Mitarbeiders in 70 Fabriken un 35 Verkööpshüüs op de ganze Welt. Dorvon 5.310 Mitarbeiders in Düütschland.

Bi en Ümsatz vun 22,148 Milliarden US-Dollar hett John Deere 2006 en Gewinn vun 1,69 Milliarden Dollar maakt.

Symbol[ännern | Bornkood ännern]

John Deere hett de Farven dunkelgröön un geel. Gröön is dat Fohrtüüch, geel de Schrift un de Rööd. Dat is so siet 1920. Al vörher hebbt se disse Farven bruukt. Natowiesen is dat bi en Ploog vun 1905, wohrschienlich hebbt se dat aver al siet 1880 so bruukt. För Bo- un Forstmaschinen warrt siet dat Inföhren vun den Industrie-Trecker DI (1935-1941) safrangeel, later ok safrangeel/swart mit witte Schrift op swart Grund as Farv bruukt. Rasenmeihertreckers gifft dat ok in beige.

Dat Logo hett vun 1848 af an en Stahlploog (to’n vör’n Ossen spannen) wiest, överschreven mit „JOHN DEERE - MANUFACTURER - WHOLESALE & RETAIL DEALER IN AGRICULTURE IMPLEMENTS“ un de Adress. Siet 1873 wiest dat en Hirsch (engelsch deer), de springt. Dit Logo is 1876 registreert worrn. Dat Logo hett den Hirsch wiest, as he övern Boomstamm jumpt, dor över schreven „JOHN DEERE“ un dor ünner „MOLINE, ILL.“. Dat Logo is in de Johren 1912, 1936, 1937, 1950, 1956, 1968 un 2000 noch wedder ännert worrn: 1912 harr de Hirsch noch ganz vele Details, siet 1936 wiest dat Logo blot noch den Ümriss. Dat vun 1937 seeg meist ut as dat vun 1876. 1950 hebbt se den Hirsch toeerst so wiest, dat de Höörn na vörn wiesen deen. Ok de Boomstamm is rutfullen. Dorbi stünn „QUALITY FARM EQUIPMENT“. Siet 1956 steiht bi’n Hirsch blot noch „JOHN DEERE“. Siet 1968 as Ümriss mit twee Been. 2000 geev dat en ganz nee Logo, dat de Hirsch na vörn springen dee, mit de Vörbeen anwinkelt in geel op en gröön Oval, mit de Schrift „JOHN DEERE“ in gröön.

Baas[ännern | Bornkood ännern]

  • John Deere (Grünner un Präsident) 1837-1886
  • Charles Deere (Präsident) 1886-1907
  • William Butterworth (Präsident) 1907-1928, (Vörstandsvörsitter) 1928-1936
  • Charles Deere Wiman (Präsident) 1928-1942
  • Burton Peek (Präsident) 1942-1944
  • Charles Deere Wiman (Präsident) 1944-1955
  • William Hewitt (Präsident) 1955-1982, (Vörstandsvörsitter) 1964-1982
  • Robert Hanson (Vörstandsvörsitter un Direkter, de dat Geschäft föhrt) 1982-1990
  • Hans Becherer (Vörstandsvörsitter un Direkter, de dat Geschäft föhrt) 1990-2000
  • Robert W. Lane (Vörstandsvörsitter un Direkter, de dat Geschäft föhrt) siet 2000

Produkte[ännern | Bornkood ännern]

Blangen Treckers warrt vör allen Maschinen för de Oornt so as Meihdöschers, Feldhäckslers un Ballenpressen un Maschinen för dat Bearbeiden vun’n Boden boot. Blangen Maschinen gifft dat ok anner Tüüch, wat bi de Oornt helpen kann, to’n Bispeel GPS-Gerät för dat Feld, Gerät för dat Meten vun de Oornt oder Software für den Ackerbuurn.

Bi de Bomaschinen gifft dat ünner annern Radladers, Planeerrupen un Eerdhobels.

Weblenken[ännern | Bornkood ännern]

Commons-logo.svg John Deere. Mehr Biller, Videos oder Audiodateien to’t Thema gifft dat bi Wikimedia Commons.