Joachim Fuchsberger
Joachim „Blacky“ Fuchsberger (* 11. März 1927 in Stuttgart; † 11. September 2014 in Grünwald) weer en düütschen Schauspeler, Talkmaster un Entertainer. Blangen de düütschen harr he ok de austraalsche Staatsbörgerschop.
Leven un Wark
[ännern | Bornkood ännern]Kindheit un Jöögd
[ännern | Bornkood ännern]Fuchsberger weer de Söhn vun en Schriftsetter, de Linotype-Vertreder vun de Mergenthaler Settmaschienenfabrik in Berlin weer. Tosamen mit twee jüngerer Bröder is Joachim Fuchsberger in Heidelbarg un Düsseldörp opwassen un is as Kind in de Hitlerjöögd wesen.[1] As de Krieg utbroken is weer he twölf Johren oolt, is aver noch wiel de Schooltiet to’n Rieksarbeitsdeenst rantogen worrn un hett nie en Schoolafsluss maakt.[1]
Gegen Enn vun’n Krieg kreeg he an de Springerschool in Wittstock/Dosse en Uttbilln to’n Fallschirmjäger (Wehrmacht)|Fallschirmjäger]]. Mit sössteihn Johren is he wegen sien Insichten in den Judo-Sport (Fuchsberger hett den eersten Dan) al na’n half Johr to’n Utbiller för’n Nahkamp maakt worrn. He weer an de Oostfront inseet, keem in Stralsund in’t Lazarett un weer deen toeerst in russ’sche Kriegsfangenschop, dorna in US-amerikaansche un toletzt in britische.
Ut disse Tiet hett he ok sien Ökelnaam „Blacky“. In’n Insatz harr he den Naam „Jackie“, wat en Fründin, de Franzöösch snacken de, ut Versehen Blacky utspraken hett. In en Interview vun 2007 segg he, dat he unafhangig vun de eersten Verkloren den glieken Naam wiel sien Tiet bi’n Bayerischen Rundfunk kreeg, vunwegen dat he in en Sennen as Spreker inspringen müss un dorbi ’n beten duun weer. De Programmdirekter harr em dorna seggt, he schüll vör en Sennen nich so vele Blackies (Black & White-Whisky) drinken.
Nakriegstiet
[ännern | Bornkood ännern]Na’t Enn vun’n Tweeten Weltkrieg arbeit Fuchsberger 1946 eerst mol veer Maanden lang ünnerdaag in de Zeche König Ludwig in Riäkelhusen in’n Steenkahlenafbo. Op disse Wies keem he ut de britschen Fangenschop in Sleswig-Holsteen free un weer dichter bi sien Familie in Düsseldörp. Dorna arbeit he as Monteur vun Sett- un Druckmaschienen in Bedrief vun sien Vadder un weer opletzt Mitarbeiter in’t chemigraafschen Afdeel vun en Verlag in Düsseldörp. 1949 is he Warfleider vun de Düütsche Boutstellen in Nürnbarg worrn. Vun 1950 bit 1952 arbeit he denn as Höörfunkspreker bi’n Senner München un as Spreker bi de Wochenschau. Bito hett he sik ok as Textdichter versöcht.
Fuchsberger hett 1951 de Slagersingersche Gitta Lind heiraat, leet sik na twee’nhalf Johren aver wedder vun ehr scheeden, üm 1954 denn de Schauspelersche Gundula Korte to heiraten. Drapen hebben schüllt sik de beiden bi’t Bayerischen Rundfunk, woneem Korte as Funktechnikersche arbeit hett.
Schauspeel-Loopbahn
[ännern | Bornkood ännern]Nadem he en poor Nevenrullen ahn Bedüden harr, füng sien Loopbahn as Schauspeler 1954 as Hööftdorsteller in den Dreedeeler 08/15 an. Sien Dorstellen vun den kloken Gefreiten Asch, de opletzt bit to’n Leutnant vun de Wehrmacht opstiggt, hett em bannig gau populär maakt. Dorna weer he noch fakener as Uniformdräger in Kriegsfilmen oder as Leefst in för de Tiet tyypsche Heimatfilmen to sehn. In de 1960er Johren is he denn as Inspekter in mehrere Edgar-Wallace-Filmen un annere Krimis to en wietbekannten Schauspeler worrn. He weer to de Tiet de ideale Besetten för de Rull vun den Vebrekerjäger ahn Bang un as Mann, de verfolgte Fronslüüd schulen de un den man troen künn. Alltohopen hett he in dörteihn Edgar-Wallace-Filmen mitspeelt. In de Edgar-Wallace-Parodie Neues vom Wixxer ut dat Johr 2007 hett he ok mitspeelt.[2]
Bi Filmen, de in’t engelschspraakige Utland verköfft worrn sünd, warrt he in’n Afspann faken as „Joachim Berger“ opföhrt. Blangen de Filmarbeit, stünn Fuchsberger bit toletzt noch regelmatig op de Theaterbühne.
Övergang to’n Moderater
[ännern | Bornkood ännern]In’t Johr 1972 weer Fuchsberger Stadionspreker bi de Olympischen Spelen in München wiel de Anfangs- und Afslussfiern in’t Münchener Olympiastadion. Bi de Slussfier an’n 11. September 1972, en poor Daag na dat Olympia-Attendat op de israeelsche Mannschop, hett man em mitdeelt, dat mööglicherwies en Terroranslag mit en Passagierfleger plaant weer, dat op dat Stadion toflöög. De Organisaters hebbt em de swore Opgaav överlaten, wat dat Stadion rüümt warrn schüll oder nich. Fuchsberger hett dorophen beslaten, de Tokiekers nix dorvun to vertellen, vunwegen dat he bang weer, dat dat en Massenpanik gifft. Later hett sik denn rutstellt, dat de Naricht vun den Anslag gor nich stimmen de.
Bi en Feernsehshow in’t Johr 1978 is Fuchsberger in’n Rahmen vun en Zirkusopföhren vun en Schimpans beten worrn un hett dorvun en swore Hepatitis B kregen. Veer Maanden lang hett he op de Isoleerstatschoon vun en Krankenhuus liggen müsst un weer to de Tiet, as he later vertell, bannig depressiv wesen. Liekers hett he de Krankheit ahn duersomen Schaden överstahn.
He hett later mehrere Feernsehows modereert, as to’n Bispeel de Speelshow Auf Los geht’s los oder de Talkshow Heut’ Abend. Mitz de Tiet hett sik mehr un mehr ok leisten künnt, Anbotten för Sennen oder Schauspeelrullen aftolehnen. Togliek kritiseer he den Verfall vun de Gööd in’t Feernsehn un den afnehmen Deepgang. In de 1970er Johren hett he ophört in Filmen mittospelen, un segg dorto, dat he jümmer intoleranter warrt, je öller he weer.
Man, he künn ok nich recht ümgahn mit de wassen Kritik an sien Sennen Auf Los geht’s los. He verdeffendeer ünner annern Erich von Däniken un de dormols eerst 15-johrige Désirée Nosbusch vör de Kritik vun de Tokiekers, de he beide bi sik in de Sennen to Gast harr, un geev to verstahn, dat he keen vun sien Gäst beleidigen laten de. Na deelwies bannige Kritik an sien Moderatschoon hett he sik Enn vun de 1980er Johren tietwies in’t austraalsch Hobart torüchtagen, woneem he vun 1983 an sien tweeten Wahnsitt harr.
En wietere Feernsehshow hett he 1990 övernahmen. Na den Dood vun Robert Lenke in’t Johr 1989, is de Sennplatz vun Was bin ich? free worrn, de Fuchsberger mit sien Quizshow Ja oder Nein füllen de. In dat Quiz müssen veer Prominente de Geheemnissen vun Gäst raden. Vun 1988 bit 2003 hett he för den Bayerischen Rundfunk butendem twintig Filmen in’n Rahmen vun de Reportaaschreeg Terra Australis dreiht, de op em tosneden weer un in de Fuchsberger Minschenun Landschoppen vun sien Wahlheimat Australien vörstellen de.
Annere Arbeiten
[ännern | Bornkood ännern]Spood harr Fuchsberger ok as Texter vun Slagerleder: Blumen für die Dame, dat he för sien eerste Fro Gitta schreven hett, Was ich dir sagen will, Der große Abschied, Schau es schneit as ok Dann kann es sein, dass ein Mann auch einmal weint, wat vun Udo Jürgens sungen weer. Butendem schreev he den Text för dat Vereensleed vun de Stuttgarter Kickers un för Leder vun Howard Carpendale un Jürgen Marcus.
Mit en Partner tosamen hett Fuchsberger Enn vun de 1960er Johren en Immobilienünnernehmen grünnt, dat aver in korter Tiet pleite gahn is. Mit 42 Johren harr he all sien Geld verloren, müss sien Villa verköpen un seet op’n Barg vun Schullen, de ünner anner ut de Regressanspröök vun schädigte Kunnen keemen. Mit Hülp vun sien Fro Gundula, den Bistand vun go’e Frünnen un harde Arbeit künn he aver en ne’e Existenz opboen, nadem all sien Schullen begleken weern.
In’t Johr 1984 is Joachim Fuchsberger de eerste düütsche Bottschopper för de UNICEF worrn. För disse Arbeit is he an’n 13. November 2006 in München mit de Bayerischen Staatmedaille för Soziale Deensten uttekent worrn.[2] 2011 weern he to’n Ehrenbottschopper vun dat Kinnerhülpswark nöömt worrn.[3]
Siet 2009 weer Fuchsberger Liddmaat vun’t Kuratorium vun de FIFA-WM 2011 vun de Fronslüüd un blangen de OK-Präsidentsche Steffi Jones schirmherr vun dat Voluteer-Programm to de FIFA-WM.[4]
Privatleven
[ännern | Bornkood ännern]Ünnerstütt weer Fuchsberger vun sien Fro Gundula, de för em as Managerin un Produzentsche arbeit hett. Ok sien Söhn Thomas (1957–2010) hett em as Komponist un Musikproduzent bi tallrieke Feernsehreportaaschen ünnerstütt. Sien Söhn is an’n 14. November 2010 in’n Möhlbeek vun Kulmbach afsopen un doodbleven.[5]
Fuchsberger is al wiel de Tiet as Soldat ut de Kark utpeddt. Siet de Tiet bekenn he sik as Agnostiker.[6] 2003 kreeg he op de Bühne en lichten Slaganfall. He harr dormols al dree Operatschonen an’t Hart achter sik. He leev mit sien Familie in Grünwald, woneem he in’n September 2014 doodbleven is.
Anners wat
[ännern | Bornkood ännern]Fuchsberger harr veel för Tasmanien över, woneem he veel Tiet tobröcht hett. 1999 is he vun’n tasmaanschen Premierminister för sien Verdeensten to’n „Ehrenbottschopper för’n Tourismus“ nöömt worrn.[7]
In de juristischen Lehr is en Fall na den Moderater betekent, de so nöömte „Fuchsberger-Fall“. De Fall hett en Klaag vun Fuchsberger gegen en Optiker behannelt, de en Bild vun em ahn sien Verlööf för Warf bruukt harr (BGH, Oordeel vun’n 14. April 1992 – VI ZR 285/91).[8]
Filmografie (Auswahl)
[ännern | Bornkood ännern]Feernsehshows
[ännern | Bornkood ännern]- 1960–1961: Nur nicht nervös werden (ARD)
- 1973–1975: Der heiße Draht (SWF)
- 1975–1976: Spiel mit mir (SWF)
- 1977–1986: Auf Los geht’s los (SWF, utstrahlt in’t Eerste)
- 1980–1991: Heut’ abend (ARD)
- 1990–1994: Ja oder Nein (ARD)
Theaterstücken
[ännern | Bornkood ännern]- 2002: Der Priestermacher (orig: Mass Appeal) vun Bill C. Davis
Utteken un Ehrungen (Utwahl)
[ännern | Bornkood ännern]- 1942: Kriegsverdeenstkrüüz 2. Klass mit Sweerten[9]
- 1961: Bravo Otto in Bronze (Kategorie: TV-Star männlich)
- 1961: Golden Bildschirm
- 1970: Bambi
- 1971: Bravo Otto in Gold (Kategorie: TV-Star männlich)
- 1979: Bayerische Verdeenstorden
- 1982: Goldene Kamera
- 1982: Bambi
- 1983: Bundsverdeenstkrüüz
- 1983: Piepensmöker vun’t Johr
- 1986: Goldene Europa
- 1994: Groot Bundsverdeenstkrüüz
- 2005: Bayerische Feernsehpries för’t Levenswark
- 2006: Bayerische Staatsmedaille för soziale Verdeensten
- 2007: Brisant Brillant för’t Levenswark
- 2007: Steiger Award för’t Levenswark
- 2008: Platin Kurier Romy för’t Levenswark
- 2009: Sass’sch Dankorden
- 2010: Goldene Kamera för’t Levenswark
- 2011: Düütsche Fernsehpries för’t Levenswark
- 2012: Bambi för’t Levenswark
Warken
[ännern | Bornkood ännern]- Böker
- Denn erstens kommt es anders… Geschichten aus meinem Leben. Bastei Lübbe, Köln 2008, ISBN 3-404-61644-8.
- Altwerden ist nichts für Feiglinge. Gütersloher Verlagshaus, Gütersloh 2010, ISBN 978-3-579-06760-5.
- Bis an seine Grenzen – und darüber hinaus. Gütersloher Verlagshaus, Gütersloh 2011, ISBN 978-3-579-06678-3.
- Höörböker
- Altwerden ist nichts für Feiglinge. Gütersloher Verlagshaus, Gütersloh 2011, ISBN 978-3-579-07634-8.
Literatur
[ännern | Bornkood ännern]- Klaus Ernst (KKM): Die Auferstehung des Joachim Fuchsberger und ein Streifzug durch das kaiserliche Österreich. In: Menschen und Medien. Zeitschrift für Kultur- und Kommunikationspsychologie. Berlin 2002, menschenundmedien.net.
Borns
[ännern | Bornkood ännern]- ↑ a b Vgl. Setzen, Sechs! – Schulgeschichten aus Deutschland (1/3). Verlorene Kindheit. Dokumentarfilm vun Dora Heinze in’n Opdrag vun’n SWR. Düütsche Eerstsennen an’n 8. Dezember 2005.
- ↑ a b Joachim Fuchsberger sien Biografie bi Who’s who; afropen an’n 20. April 2013
- ↑ “Blacky” Fuchsberger zum Unicef-Ehrenbotschafter ernannt, Hamburger Abendblatt vun’n 4. Februar 2011.
- ↑ Anstoß für “Volunteers 2011”, dfb.de vun’n 23. Oktober 2009.
- ↑ “Blacky” Fuchsberger trauert um Sohn, sueddeutsche.de vun’n 15. Oktober 2010
- ↑ Joachim Fuchsberger:„Ich glaube an sehr vieles: Ich bin ein Agnostiker.“ in de ARD-Sennen Maischberger vun’n 18. Januar 2011: Altwerden macht Spaß? Alles Lüge! 49. Minuut, op mediathek.daserste.de
- ↑ Fuchsberger Biografie bi Steffi-line.de
- ↑ „Fuchsberger-Fall“
- ↑ Joachim “Blacky” Fuchsberger – Jahrgang 1927 in de Reeg Kriegskinder
Weblenken
[ännern | Bornkood ännern]
Joachim Fuchsberger. Mehr Biller, Videos oder Audiodateien to’t Thema gifft dat bi Wikimedia Commons.
- Literatur vun un över Joachim Fuchsberger in’n Katalog vun de Düütschen Natschonalbökeree
- Joachim Fuchsberger in de Internet Movie Database (engelsch)
- Joachim Fuchsberger sien Biografie bi WHO’S WHO
- Von “unter Tage” nach ganz oben – Joachim Fuchsberger vertellt ut sien Leven in de WDR 5-Reeg Erlebte Geschichten vun’n 18. April 2004