James Craig Watson
James Craig Watson (* 28. Januar 1838 in Fingal, Ontario, Kanada; † 23. November 1880 in Madison, Wisconsin) weer en US-amerikaanschen Astronom.
Leven un Wark
[ännern | Bornkood ännern]Watson weer boren, as sik sien Öllern in Kanada ophollen harrn, liekers weern se US-Amerikaners.
He hett 1857 an de University of Michigan gradueert. Wiel sien Tiet as Student hett he sik mit de himmelsmechaanschen Warken vun Pierre Simon Laplace befaat, hett Linsen slepen un en Telekop konstrueert. As he sien Studium afslaten harr, hett he in Michigan en Steed as Hülpsmann an’n Lehrstohl för Astronomie kregen. Wegen sien ümfangrieken Bereken un Beobachten is he al 1859 Professer för Astronomie worrn. Ünner annern harr he en Komeet opdeckt un bestimm 1858 de Bahn vun den Komeet C/1858 L1 (Donati).
In’t Johr 1863 is de Baas vun de Steernwacht worrn. Dat sülve Johr hett he mit (79) Eurynome sien eersten Asteroid opdeckt. in de beiden Johren dorna hett he wietere acht Asteroiden funnen, dorünner ok den hunnersten. To de Opdecken is in Paris en Gedenkmünt rutbröcht worrn, op de Watson to sehn is blangen dree annere Mehrfackopdeckers, nämlich John R. Hind, Hermann Goldschmidt un K. T. R. Luther.
Watson hett 1869/70 an Expeditschonen op den Mount Pleasant, Iowa un na Carlentini op Sizilien deelnahmen, üm Sünndüsternissen to beobachten. 1874 beobacht he vun Peking ut den Dörgang vun de Venus vör de Sünn un 1878 en totale Sünndüsternis vun Wyoming ut. He wull dorbi vör allem na en Planeten binnen de Merkurbahn söken. Watson weer dorvun övertüügt, dat dat den Planet Vulkan, binnen de Merkurbahn, as ok en Planet buten de Bahn vun Neptun geev. Bi de Düsternis 1878 hett he twee ro’e Objekten funnen, de he as binnere Planeten interpreteeert hett, man de Beobachten künnen nienich bestätigt warrn.
1879 is he an de University of Wisconsin wesselt, woneem he den Lehrstohl för Astronomie övernahmen hett. In de Tiet dorna hett he siek wieter intensiv mit de Söök na den Planet Vulkan befaat, den dat na dat hüütigen Weten aver nich gifft.
Watson hett alltohopen veeruntwintig Asteroiden opdeckt un mehrere Warken to de Astronomie publizeert. Wegen sien Leistungen hett he en Reeg vun Utteken kregen. He weer 1868 in de National Academy of Sciences opnahmen un kreeg 1870 de Lalande-Medaille vun de franzööschen Akademie, mit de vör am ok al annere Opdeckers vun Asteroiden ehrt weern. Dat glieke Johr weer he ok Ehrendokter vun de Universität Leipzig. 1879 is he in de American Academy of Arts and Sciences wählt worrn. Na em sülvst is de Asteroid (729) Watsonia nöömt.
Weblenken
[ännern | Bornkood ännern]- Publikatschonen vun J. C. Watson in’t Astrophysics Data System
- G. C. Comstock: Biographical Memoir of James Craig Watson. Sidereal Messenger, vol. 7 (1888), S. 273–286 (Naroop, engelsch)