Jakobus de Öllere
Jakobus de Öllere, (Hebrääsch יעקב בן־זַבדַי Ja'akov ּBen-Savdai, Latiensch Iacobus Maior „Jakobus de Grote“, lat. ok Iacobus Zebedaei „Jakobus Zebedäus“, up Spaansch Santiago;in Bremen up Platt Juxmajor nömmt, is en Jünger un Apostel vun Jesus vun Nazaret. Sien Binaam de Öllere hett he kregen to'n Unnerscheed vun den annern Jünger mit Naam Jakobus, de Jakobus de Jüngere nömmt wurrn is.
Jakobus in de Bibel
[ännern | Bornkood ännern]He warrt to’n Jünger beropen, as he tosamen mit sien Broer Johannes up dat Schipp vun sien Vadder Zebedäus togange is[1] Unner Umstänn is he en Neffen vun Jesus ween[2] In de dree Johre, wo Jesus rumwannern dö, weer Jakobus jummers in siene Neegde. He is een vun de dree wichtigsten Jüngers wurrn, na sien Broer Johannes un Simon Petrus.[3] In de Apostelgeschicht steiht to lesen, dat he dör Herodes Agrippa I. mit dat Sweert to Dode brocht wurrn is. Dor weer he de eerste Merteler mank de Jüngers oder Apostels mit[4] :
- Um de dore Tied rüm lä König Herodes Hand an welk vun de Gemeende, he wull ehr Leegs andoon. He richt Jakobus, Johannes sienen Broder, mit’t Sweert hen.[5]
Jakobus de Öllere hett nich den Breef vun Jakobus schreven, de in de Bibel upnahmen wurrn is. Düsse Breef is, so warrt dat overlevert, vun Jakobus den Gerechten schreven wurrn, vun Jesus sien Broer. ´
Schutzpatroon, Kennteken un Naamsdag
[ännern | Bornkood ännern]In de christliche Ikonographie is de Schell vun de Sankt-Jakobsmussel dat Kennteken vun Jakobus den Ölleren. De is anmaakt an sien Hoot, Mantel oder Büdel.[6] De Sankt-Jakobsmussel hett ehrn Naam dorvun kregen. Ok warrt he faken afbillt mit en Staff, dat Kennteken vun de Pilgerlüde.
De Orden vun Sankt Jakob vun dat Sweert hett Jakobus den Ölleren as Schutzpatroon utwählt. Na de Legenn weer sien Graff up dat „Steernfeld“ in Santiago de Compostela funnen wurrn. En Steern harr dor den Weg wiest. Ok in de Graafschop Holland hett dat en Orden vun Sankt Jakob geven.
Dat warrt vertellt, dat König Ordoño I. in dat Johr 859 in en Slacht gegen de Mauren stunn, as siene Armee miteens unverwacht Hölp kregen hett vun en afsunnerlichen Riedersmann. De keem bi un slöög de Mauren doot, so dat de Slacht wunnen wurrn is. Dat lett, as wenn de Rieder numms anners ween is, as Sankt Jakob (Santiago). Vun dor af an hett he in Spanien ok den Titel Matamoros (Maurenslachter). Vun dor af an keem ok de Saak mit den Jakobsweg in’n Gang.
Sien Naamsdag is up’n 25. Juli. In de Orthodoxe Karken liggt he up’n 30. April. He is de Patroon un Schutzhillige vun Spanien (sunnerlich vun Galizien un Santiago de Compostela), Antigua, Guatemala, Chile (sunnerlich Santiago de Chile), Loíza, Medjugorje, Montréal, Nicaragua, Pistoia, Sint-Jacobiparochie, Den Haag, Kemzeke un vun de Suldaten, Rieders- un Kriegslüde, Arbeidslüde, Lastendreegers, Hootmakers, Bunt- un Pelzwarkers, Strumpmakers, Smeelüde, Afthekers un Drogisten, Tierdokters un Pilgerslüde un he schall ok helpen gegen Rheuma un Arthritis un for goot Weer un dat Wassen vun Appels un Feldfrüchte.
Wat een weten schall
[ännern | Bornkood ännern]- An’n 25. Januar 2007 is in dat Auktschoonshuus Sotheby’s dat Wark "Portret van St.-Jacob de Meerdere" vun Rembrandt ut 1661 for $ 25,8 Mio. unner’n Hamer kamen.[7]
Belege
[ännern | Bornkood ännern]- ↑ Kiek bi dat Evangelium na Matthäus 4, 21ff
- ↑ vergliek Matthäus 27,56, Evangelium na Markus 15,40 un 16,1 un Apenbarung vun Johannes 19,25
- ↑ Kiek bi Matthäus 17,1 un 26,37 un Lukas 8,51).
- ↑ Kiek bi Apostelgeschicht 12,1f
- ↑ In Karl-Emil Schade siene Oversetten
- ↑ Hall, J. (2000). Hall's Iconografisch Handboek. Leiden: Primavera Pers.
- ↑ www.tctubantia.nl
Biller
[ännern | Bornkood ännern]-
St. Jakob, vun Rembrandt van Rijn -
En Bild ut Süüdamerika vun St. Jakob as „Maurenslachter“
Weblenken
[ännern | Bornkood ännern]
