Henning Scherf

Henning Scherf (* 31. Oktober 1938 in Bremen) weer vun den 4. Juni 1995 bit to’n 8. November 2005 Präsident vun den Bremer Senat un Börgermeester vun de Free Hansestadt Bremen.

Studium

Nah dat Abitur hett Scherf vun 1958 af an Juristeree un Soziologie in Freiburg im Breisgau, Berlin un Hamborg studeert. Dor hett he dat eerste un dat tweede juristisch Staatsexamen maakt un hett dat Ganze afslaten mit de Arbeit to’n Dr. jur. Bit 1971 is he denn in Bremen as Afkaat togange ween.

SPD

Vun 1963 af an is Scherf Maat bi de SPD. Vun 1972 bit 1978 weer he Vörsitter vun de SPD in dat Land Bremen. Vun 1984 bit 1999 weer he ok in den Vörstand vun de SPD in Düütschland.

Senator

1971 is Scherf in de Bremer Börgerschup wählt wurrn. 1978 is he dor utscheden, as Hans Koschnik em as Senator för Finanzen in sienen Senat upnahmen hett.

1979 is he Senator för Jöögd un Soziale Saken wurrn. Vun 1985 bit 1991 weer he ok noch (twede) Börgermeester un Stellvertreder vun den dormaligen Präsidenten vun’n Senat Klaus Wedemeier. 1987 weer Scherf för’n Öbergang Senator för Gesundheit un Sport. 1990 is he Senator för Bildung, Wetenschup un Kunst wurrn, vun 1991 bit 1995 weer he Senator för Bildung un Wetenschup. Vun 1991 af an weer he babento ok noch Senator för Justiz un Verfaten.

Börgermeester

Bi de Wahl to de Bremer Börgerschup in dat Jahr 1995 hett de SPD bannig veel Stimmen verlaren un de Börgermeester Klaus Wedemeier hett Bott geben mößt.

Henning Scherf is em as Baas vun de Regeren in dat Bundsland Bremen upfolgt. Vun de Tiet af an gifft dat in Bremen en Grote Koalitschoon ut SPD un CDU. Scherf weer ok Karkensenator un Senatsbeupdragten för Datenschutz. In de Politik vun de Bundsrepubliek Düütschland hett he dat Amt as Vörsitter vun den Utschuss för Strietfragen (Vermittlungsausschuss) vun Bundsdag un Bundsrat.

As Baas vun de Regeren un as Börgermeester in Bremen hett Scherf jümmers versöcht, tosamen mit de Annern un nich in’n Striet sien Arbeit to bedrieben. He is alltiet up de Lüe togahn (dorüm hett he ook den Ökelnaam "Omaknutscher" kregen) un weer bi de Börgers in Bremen persönlich beter ansehn, as sien Partei un as sien Regeren.

Vör de Wahl to de Börgerschup in dat Jahr 2003 hett he seggt, he woll bloß Börgermeester blieben, wenn de Bremers de SPD up den eersten Platz wählen döen. Anners mössen se ohne em torechtkamen. Dat hett klappt un so is he Börgermeester bleben.

Afscheed

So as een dat vermoden ween konn, hett he, as he noch in’t Amt weer, an’n 28. September 2005 bi en Parteidag vun de SPD künnig maakt, dat he nu Bott geben woll. He hett seggt, dor geef dat persönlich Grünnen för un he woll nich, dat se em eens Dags mit de Föten vörut ut dat Raathuus dregen schollen.

An’n 8. November 2005 is Jens Böhrnsen em as Börgermeester upfolgt.

Autor

In de Tiet vun sien Rohstand hett he en Book schreven, wat sik ut'neensetten deit mit de Rull vun de olen Lüde in use Sellschupp. Düt Book heet „Grau ist bunt“ un is 2006 rutkamen un hett sik unbannig goot verkopen laten (ISBN 978-3-451-28593-6).

Kiek ok bi

Börgermeesters vun de Free Hansestadt Bremen na den Tweeten Weltkrieg