Hannah Arendt

Vun Wikipedia
Wesseln na: Navigatschoon, Söök
Hannah Arendt up en Breefmark vun de Duersammarkenserie Frauen der deutschen Geschichte, Deutsche Bundespost Berlin 1988

Hannah Arendt (* 14. Oktober 1906 in Linnen, hüdigendags Hannober; † 4. Dezember 1975 in New York; an un for sik Johanna Arendt) weer en jöödsche Gelehrte un Publizistin, de in Düütschland un de Vereenigten Staten tohuse weer.

To de Philosophie is se mit 14 Johren kamen, as se up een Slag de Kritik vun de schiere Vernunft vun Immanuel Kant dörlesen hett. Later wull se for dull bi Martin Heidegger up Philosophie studeern un hett sik glieks mit em inlaten, ofschoonst he 17 Johre öller weer un Fro un Kinner harr. 1933 hett se Düütschland verlaten un toeerst mol in Paris en Heimat funnen. Dat Düütsche Riek hett ehr 1937 utbörgert un so weer se statenloos, bit se 1951 de Börgerrechten in de USA kregen hett. Unner annern hett se arbeit as Lehrerin an de Hooochschool un as Journalistin un hett wichtige Bidräge to de polietsche Philosophie aflevert. Sunnerlich dör en Book över den Prozess vun Adolf Eichmann in Jerusalem mit den Unnertitel „von der Banalität des Bösen“ is se wiethen bekannt wurrn un hett dor allerhand Lüde mit gegen sik upbrocht, sunnerlich ok veel vun de Joden, de de Nazitied bloß man knapp överleevt harrn. Ehr is vörsmeten wurrn, se harr sik vun ehr egen Volk losmaakt un dat Jodendom verraden.